بھارتی کپتان روہت شرما نے کڑی تنقید پر سابق لیجنڈری کرکٹڑ سنیل گواسکر کیخلاف بھارتی کرکٹ بورڈ (بی سی سی آئی) میں شکایت درج کرادی۔
بھارت کے کپتان روہت شرما کو آسٹریلیا کیخلاف بارڈر گواسکر ٹرافی کے دوران بیٹنگ اور پھر کپتانی کے لحاظ سے مشکلات کا سامنا کرنا پڑا، انہوں نے ایونٹ کے 3 ٹیسٹ میچوں میں صرف 31 رنز بنائے جبکہ ان کی کپتانی میں بھارت کو آسٹریلیا کیخلاف سیریز میں 1-3 سے شکست کا سامنا کرنا پڑا اور بھارت ٹیسٹ چیمپئن شپ کے فائنل کی دوڑ سے بھی باہر ہوگیا۔
سابق بھارتی کرکٹر سنیل گواسکر نے مایوس کن کارکردگی پر روہت شرما کی بیٹنگ اور کپتانی دونوں پر شدید تنقید کی تھی، انہوں نے روہت کے ریڈ بال کرکٹ کے مستقبل پر بھی سوال اٹھائے تھے۔
سنیل گواسکر نے تجویز دیتے ہوئے یہ بھی کہہ دیا کہ بھارتی ٹیم کی بہتری کیلئے کسی اور کو قیادت سونپنے کا وقت آچکا ہے۔
بھارتی میڈیا رپورٹس کے مطابق روہت شرما کو تنقید پسند نہیں آئی اور انہوں نے محسوس کیا کہ ان پر غیر ضروری تنقید کی جارہی ہے، اب اطلاعات کے مطابق روہت شرما نے بھارتی کرکٹ بورڈ میں سنیل گواسکر کیخلاف شکایت درج کرائی ہے۔
بھارتی کپتان کے قریبی ذرائع نے مقامی میڈیا کو بتایا کہ روہت شرما کو لگا کہ سنیل گواسکر نے غیر ضروری تنقید کی اور اسی لیے انہوں نے گواسکر کیخلاف بی سی سی آئی میں شکایت کی ہے۔
