دنیا بھر کی طرح پاکستان میں بھی کشمیری عوام بھارتی یوم جمہوریہ کو یوم سیاہ کے طور پر منارہی ہے۔ اسلام آباد میں کل جماعتی حریت کانفرنس کی جانب سے بھارتی ہائی کمیشن کے سامنے احتجاجی مظاہرہ کیا گیا۔ وزیراعظم آزاد کشمیر چوہدری انوار الحق کا کہنا ہے کہ دنیا جان چکی آزادی کی جنگیں خون سے لڑنی پڑتی ہیں، محض اخلاقی سفارتی حمایت سے مسئلہ کشمیر حل نہیں ہوگا، ایک قدم آگے بڑھنا پڑے گا۔
بھارت آج یوم جمہوریہ منا رہا ہے، اس موقع پر پاکستان سمیت دنیا بھر میں کشمیری عوام اس دن کو یوم سیاہ کے طور پر منارہے ہیں۔
اسلام آباد میں کل جماعتی حریت کانفرنس کی جانب سے بھارتی ہائی کمیشن کے سامنے احتجاجی مظاہرہ کیا گیا، جس میں وزیراعظم آزاد کشمیر چوہدری انوار الحق، خواتین اور بچوں سمیت عوام کی بڑی تعداد نے شرکت کی۔
مظاہرین نے بازوؤں پر سیاہ پٹیاں اور ہاتھوں میں سیاہ جھنڈے تھام رکھے ہیں۔ مظاہرین نے کہا کہا کہ بھارت جمہوری نہیں بلکہ ایک فاشسٹ ملک ہے، بھارت نے مقبوضہ کشمیر میں تمام انسانی حقوق سلب کر رکھے ہیں۔
اس موقع پر مظاہرین سے خطاب کرتے ہوئے وزیر اعظم آزاد کشمیر چوہدری انوار الحق نے کہا کہ بھارت ریاستی دہشتگردی پر پردہ ڈالنے کیلئے پاکستان پر الزام لگاتا ہے، بھارت نے کینیڈا اور امریکا میں بھی لوگوں کو قتل کرایا، عالمی دنیا کے دوہرے معیار اب نہیں چل سکیں گے۔
ان کا کہنا ہے کہ دنیا جان چکی آزادی کی جنگیں خون سے لڑنی پڑتی ہیں، محض اخلاقی سفارتی حمایت سے مسئلہ کشمیر حل نہیں ہوگا، کشمیر کی آزادی کیلئے ہمیں ایک قدم آگے بڑھنا ہوگا۔
