بھارتی کرکٹر ویرات کوہلی نے بھارتی فوجی جوان کے ساتھ تصویر بنوانے سے انکار کردیا، ویڈیو وائرل ہوگئی۔
بھارتی کرکٹ ٹیم کے اسٹار بیٹر ویرات کوہلی کی ایک ویڈیو سوشل میڈیا پر وائرل ہو رہی ہے جس میں دیکھا جاسکتا ہے کہ ایک بھارتی فوجی نوجوان ہاتھ میں موبائل پکڑے ویرات کوہلی کے پاس آتا ہے تاکہ ان کے ساتھ تصویر لی جاسکے لیکن ویرات اسے انکار کرتے ہوئے آگے بڑھ جاتے ہیں۔
ویڈیو وائرل ہوئی تو صارفین کی جانب سے اس پر مختلف تبصرے کئے گئے، ایک صارف نے ویڈیو پر تبصرہ کرتے ہوئے کہا کہ ویرات کوہلی نے فوجی جوان کے ساتھ سیلفی لینے سے انکار کردیا، اس لئے اپنے رول ماڈل یا آئیڈیل کا انتخاب سمجھداری سے کریں۔
ایک اور صارف نے لکھا کہ ایسے کھلاڑی ان کے آئیڈیل نہیں ہوسکتے کیونکہ یہ لوگ پیسے کیلئے کرکٹ کھیلتے ہیں، ہندوستان کیلئے نہیں۔ انہوں نے تنقید کرتے ہوئے کہا کہ لوگوں نے انہیں بہت زیادہ توجہ دیکر مشہور کردیا ہے۔
آہان حیدر نامی صارف نے لکھا کہ کوئی فوجی جوان کے ساتھ اس طرح کا برتاؤ کیسے کرسکتا ہے۔ ایک صارف نے طنزاً لکھا کہ ویرات کوہلی اب یوکے کی آرمی کے ساتھ سیلفی لیں گے۔ ایک اور صارف نے ویرات کوہلی کو لکھا کہ آپ دن بدن نظروں سے گرتے جارہے ہیں۔
سوشل میڈیا کے کئی صارفین کا کہنا تھا کہ انہیں بھارتی کھلاڑی کا رویہ دیکھ کر شدید مایوسی ہوئی اور ویرات کوہلی کو ایک فوجی نوجوان کے ساتھ ایسا رویہ اپناتے ہوئے شرم آنی چاہئے تھی۔
