خیبر پختون خوا حکومت نے مستحق بچیوں کی شادیاں کروانے اور 2 ، 2 لاکھ روپے نقد دینے کا فیصلہ کر لیاہے ۔
تفصیلات کے مطابق وزیراعلیٰ خیبرپختونخوا علی امین خان گنڈاپور کی زیر صدارت محکمہ سوشل ویلفیئر کا اجلاس ہوا جس دوران جہیز فنڈ کے تحت مستحق بچیوں کی شادیوں کے اجتماعی پروگرام کرانے کا فیصلہ کر لیا گیا ۔
جہیز فنڈز سے صوبے کی 4 ہزار سے زائد مستحق بچیوں کی شادیاں کروائی جائیں گی، شادیوں کی اجتماعی تقریبات صوبائی حکومت کے خرچے پر منعقد کی جائیں گی، شادی کرنے والی ان مستحق بچیوں کو دو، دو لاکھ روپے نقد بھی دئیے جائیں گے۔
وزیراعلیٰ علی امین گنڈا پور نے ہدایت کی کہ پناہ گاہوں کے بجٹ کو صوبائی حکومت کے مستقل بجٹ کا حصہ بنایا جائے، صوبے میں غیر فعال پناہ گاہوں کو فوری طور پر فعال کیا جائے۔
اجلاس میں وزیراعلیٰ علی امین گنڈا پور نے خصوصی طلبہ کو وہیل چیئر دینے کا فیصلہ بھی کیا ۔ پہلے مرحلے میں اعلیٰ تعلیمی اداروں کے خصوصی طلبہ کو وہیل چیئرز دی جائیں گی ۔
