بھارت کی ملیالم شوبز انڈسٹری سے تعلق رکھنے والے اداکار دلیپ شنکر ہوٹل کے کمرے میں مردہ پائے گئے۔
بھارتی میڈیا رپورٹس کے مطابق ساؤتھ فلم انڈسٹری کے اداکار دلیپ شنکر کی لاش اتوار کو ریاست کیرالہ کے شہر تھیرو وانانتھا پورم کے ایک ہوٹل کے کمرے سے ملی۔
رپورٹ کے مطابق دلیپ شنکر نے 19 دسمبر کو ہوٹل میں چیک ان کیا تھا اور قیام کے دوران وہ ایک بار بھی کمرہ چھوڑ کر باہر نہیں گئے تھے، جب دلیپ شنکر کے ساتھی اداکاروں نے انہیں فون کیا تو رابطہ نہ ہوا، جس پر وہ اتوار کو ہوٹل پہنچے اور عملے سے کمرہ کھولنے کا کہا۔
بھارتی میڈیا کے مطابق ہوٹل کا کمرہ کھولا گیا تو دلیپ وہاں مردہ پائے گئے، وہ ایک ٹیلی ویژن سیریز کی شوٹنگ کیلئے شہر میں موجود تھے۔
سیریز کے ڈائریکٹر نے پولیس کو بتایا کہ دلیپ شنکر کسی سنگین بیماری میں مبتلا تھے، تاہم اس کی نوعیت معلوم نہیں، لیکن اندازہ ہوا تھا کہ وہ کسی سنگین بیماری کا علاج کروا رہے تھے۔
رپورٹ کے مطابق پولیس نے تحقیات شروع کردی ہیں، البتہ ابتدائی تحقیقات کے مطابق اداکار کی موت میں کوئی غیر معمولی عنصر شامل نہیں، موت کی اصل وجہ پوسٹ مارٹم کے بعد معلوم ہوگی۔
