پاکستان اور آسٹریلیا کے درمیان ایک روزہ ورلڈ کپ مقابلوں میں اب تک 10 میچز کھیلے جاچکے ہیں، جس میں آسٹریلیا کا پلڑا بھاری ہے۔
انٹرنیشنل کرکٹ کونسل (آئی سی سی) ون ڈے ورلڈکپ 2023ء میں پاکستان کرکٹ ٹیم جمعہ 20 اکتوبر کو 5 بار کی عالمی چیمپئن آسٹریلیا کے مدمقابل ہوگی۔
جاری میگا ایونٹ میں پاکستان اب تک 3 میچز کھیل کر 2 کامیابیاں اپنے نام کرچکا ہے، گرین شرٹس نے نیدرلینڈز اور سری لنکا کو شکست دی تاہم روایتی حریف بھارت کے ہاتھوں اسے شکست کا سامنا کرنا پڑا۔
پانچ بار کی عالمی چیمپئن آسٹریلیا بھی اب تک ایونٹ میں 3 میچز کھیل چکی ہے تاہم اسے صرف ایک کامیابی ملی ہے، کینگروز کو 2 شکستوں کا سامنا کرنا پڑا ہے۔
پاکستان اور آسٹریلیا کل رواں ورلڈ کپ میں آمنے سامنے ہوں گی، دونوں ٹیموں کا یہ چوتھا میچ ہوگا، بنگلورو میں کھیلا جانیوالا میچ پاکستانی وقت کے مطابق ڈیڑھ بجے شروع ہوگا۔
عالمی مقابلوں میں آسٹریلیا کو پاکستان پر برتری حاصل ہے، کینگروز نے 10 مقابلوں میں سے 6 میں کامیابی حاصل کر رکھی ہے جبکہ گرین شرٹس 4 میچز جیت سکے ہیں، میگا ایونٹ میں یہ دونوں ٹیموں کے درمیان 11 واں میچ ہوگا۔
اس سے قبل پاکستان ٹیم آسٹریلیا سے 1975ء میں پہلی بار ورلڈ کپ میں ٹکرائی تھی، جس میں اسے 73 رنز سے شکست کا سامنا کرنا پڑا، دونوں ٹیموں کے درمیان دوسری بار 1979ء میں مقابلہ ہوا، پاکستان نے گزشتہ شکست کا بدلہ لیتے ہوئے میچ 89 رنز سے اپنے نام کیا۔
پاکستان اور بھارت کی میزبانی میں 1987ء میں میگا ایونٹ منعقد ہوا جس میں آسٹریلیا کا سیمی فائنل میں گرین شرٹس سے مقابلہ ہوا، کینگروز نے پاکستان کو اس کے ہوم گراؤنڈ پر 18 رنز سے شکست دی، ساتھ ہی پہلی بار ایونٹ کا ٹائٹل بھی اپنے نام کیا۔
آسٹریلیا اور نیوزی لینڈ کی میزبانی میں ہونیوالے 1992ء ورلڈ کپ میں پاکستان اور آسٹریلیا ایک بار پھر آمنے سامنے آئے، گرین شرٹس نے ایک بار پھر کینگروز کو شکست دے کر پچھلی ہار کا بدلہ لے لیا، یہ مقابلہ پاکستان نے 48 رنز سے جیتا۔ عمران خان کی کپتانی میں پاکستان نے پہلی بار میگا ایونٹ کا ٹائٹل اپنے نام کیا تھا۔
انگلینڈ میں ہونیوالے 1999ء ورلڈ کپ میں پاکستان اور آسٹریلیا کی ٹیمیں دو بار مد مقابل آئیں، گروپ میچ میں پاکستان نے کینگروز کو 10 وکٹوں سے شکست دی تاہم فائنل میں اسٹیو وا الیون نے گرین شرٹس سے ہار کا بدلہ 8 وکٹوں سے شکست دے کر لیا اور ٹرافی جیت لی۔
میگا ایونٹ کے 2003ء مقابلوں میں پاکستان اور آسٹریلیا کے درمیان 7ویں بار ٹکراؤ ہوا، کینگروز نے گرین شرٹس کو 82 رنز کے بڑے ماجن سے شکست دی جبکہ 2011ء میں پاکستان نے 1999ء ورلڈ کپ سے ناقابل شکست رہنے والی دفاعی چیمپئن ٹیم آسٹریلیا 4 وکٹوں سے شکست دی۔
ورلڈ کپ 2015ء میں پاکستان اور آسٹریلیا کی ٹیمیں کوارٹر فائنل میں مدمقابل آئیں، کینگروز نے میچ 6 وکٹوں سے اپنے نام کیا، اس ٹورنامنٹ کی فتح بھی آسٹریلیا تھی، 2019ء میں پاکستان اور آسٹریلیا کی ٹیمیں دسویں بار میگا ایونٹ میں آمنے سامنے آئیں، اس بار بھی کینگروز نے گرین شرٹس کو 41 رنز سے ہرایا۔
پاکستان نے ورلڈ کپ مقابلوں میں 2011ء کے بعد سے آسٹریلیا کو شکست نہیں دی، کینگروز کی موجودہ پرفارمنس میں پاکستان کے پاس انہیں شکست دینے کا بہترین موقع ہے۔
