وزیر دفاع خواجہ آصف کا کہنا ہے کہ مذاکرات اچھی بات مگر بانی پی ٹی آئی کی گارنٹی کون دے گا؟ وہ تو دن میں کئی رنگ بدلتے ہیں۔
وزیر دفاع خواجہ آصف نے ایکس پر بیان میں کہا کہ مذاکرات چند دن پہلے تک صرف اسٹیبلشمنٹ تک حلال اور حکومت سے حرام تھے ۔ یہ دوغلا پن اور دہرا معیار تحریک انصاف کی شناخت اور کلچرہے۔
خواجہ آصف نے کہا کہ ایک زمانہ تھا جنرل باجوہ اور فیض ضامن ہوتے تھے ۔ یہ تب کی بات ہے جب محبت جوان تھی ۔ انہوں نے مزید کہا کہ پی ٹی آئی لیڈر ہلاکتوں کی تعداد بتاتے ہیں لیکن ثبوت فراہم نہیں کرتے۔ رینجرز اور پولیس کی شہادتوں کا اعتراف تو دور ذکر تک نہیں کرتے۔
وفاقی حکومت اور تحریک انصاف کے درمیان مذاکرات کیلئے برف پگھلنے لگی ہے اور دونوں کے درمیان ملاقاتوں کا آغاز ہو گیا ہے۔ پی ٹی آئی قیادت نے سپیکر قومی اسمبلی ایاز صادق سے رابطے شروع کر دیئے ہیں اور اس ضمن میں گزشتہ روز بیرسٹر گوہر ، عمر ایوب اور عامر ڈوگر نے سپیکر قومی اسمبلی سے ملاقات کی جبکہ آج سابق سپیکر اسد قیصر کی بھی ملاقات ہوئی ہے ۔ مذاکرات کیلئے عمران خان نے مذاکراتی کمیٹی ٹیم کو مکمل اختیار دے رکھا ہے ۔
