ترجمان دفتر خارجہ نے بیان جاری کرتے ہوئے کہاہے کہ پاکستان شام کیخلاف اسرائیلی جارحیت اورغیر قانونی قبضےکی شدیدمذمت کرتا ہے، شام کی خودمختاری اورعلاقائی سالمیت پرحملہ عالمی قانون کی سنگین خلاف ورزی ہے۔
ترجمان دفتر خارجہ ممتاززہرہ بلوچ کا کہناتھا کہ اسرائیل کے اشتعال انگیز اقدامات پہلے سے ہی غیر مستحکم خطے میں خطرناک پیشرفت ہے، اسرائیل عالمی قوانین اور سلامتی کونسل کی قراردادوں کی کھلم کھلا خلاف ورزی کر رہا ہے، پاکستان شام کی خودمختاری اور علاقائی سالمیت کی مکمل حمایت کا اظہار کرتا ہے۔
دفتر خارجہ کے مطابق اسرائیل کی جانب سے شام میں طاقت کے ذریعے علاقے کے حصول کو مسترد کرتے ہیں، پاکستان اقوام متحدہ کی سلامتی کونسل کی قرارداد 497 کی اپنی حمایت کا اعادہ کرتاہے، سلامتی کونسل سمیت عالمی برادری اسرائیل جارحیت روکنے کیلئے فیصلہ کن اقدامات کرے، فلسطین اور شام کے مقبوضہ علاقوں سے مکمل اسرائیلی انخلاء کے بغیر امن قائم نہیں ہو سکتا۔
