سپریم کورٹ نے بانی پی ٹی آئی عمران خان کی اڈیالہ سے خیبرپختونخوا کے کسی جیل منتقلی کی درخواست خارج 20 ہزار روپے جرمانے کے ساتھ خارج کر دی۔
بانی پی ٹی آئی کی اڈیالہ سے خیبرپختوںخوا جیل منتقلی کی درخواست پر سپریم کورٹ میں سماعت ہوئی۔ جسٹس محمد علی مظہر نے ریمارکس دیے کہ بانی پی ٹی آئی کو کوئی مسئلہ ہوگا تو خود درخواست دیں گے، بانی پی ٹی آئی کے 3 وکلا آج بھی عدالت میں موجود تھے۔ بانی پی ٹی آئی کے کسی وکیل نے ایسی کوئی درخواست نہیں دی۔
جسٹس جمال مندوخیل نے کہا کہ ایسی درخواستیں قیدی کے اہلخانہ یا وہ خود ہی دے سکتے ہیں، درخواست گزار نے موقف اختیار کیا کہ یہ قومی مسئلہ ہے کسی کی ذات کا نہیں، جسٹس جمال مندوخیل نے ریمارکس دیے کہ قومی مسائل آپ رکن اسمبلی بن کر سوچیے گا۔
شہری قیوم خان نے سیکورٹی وجوہات پر بانی پی ٹی آئی کی منتقلی کیلئے درخواست دائر کر رکھی ہے۔ عدالت نے درخواست خارج 20 ہزار روپے جرمانے کے ساتھ خارج کر دی۔
