نگران وزیراعظم انوارالحق کاکڑ نے چینی ہم منصب لی چیانگ سے ملاقات کی ہے۔ دونوں رہنماؤں نے باہمی تعلقات کو مزید فروغ دینے کے عزم کا اعادہ کیا۔ سیاسی، اقتصادی، تعلیم، سائنس ٹیکنالوجی، ثقافتی اور عوام کے آپسی تعلقات کو وسعت دینے پر اتفاق کیا گیا۔
وزیراعظم نے چینی قیادت کو تیسرے بیلٹ اینڈ روڈ فورم کے شاندار انعقاد پر مبارکباد پیش کی۔ چین پاکستان اقتصادی راہداری کی پاکستان کی معیشت کیلئے اہمیت کا تذکرہ کیا۔
انوارالحق نے کہا بیلٹ اینڈ روڈ منصوبہ پوری دنیا کیلئے کلیدی اہمیت رکھتا ہے، سی پیک اپنی تعمیر کےنئے دور میں داخل ہو چکا، چینی کمپنیوں کی سرمایہ کاری سے پاکستان کی برآمدات میں اضافہ اور صنعتی استعداد بڑھے گی ، صنعتوں ، معدنیات ، آئی ٹی اور زراعت کی ترقی ہو گی۔
چینی وزیراعظم نے امید ظاہر کی کہ دونوں ملکوں کی قیادت کی ہم آہنگی اقتصادی تعلقات کو مزید فروغ دے گی ۔ دونوں وزرائےاعظم مختلف شعبوں میں تعاون کی مفاہمتی یاداشتوں پر دستخط کی تقریب میں شریک ہوئے۔
مفاہمتی یاداشتوں میں ایم ایل ون سمیت مواصلات ، کامرس، غذائی تحفظ و تحقیق ، میڈیا تبادلے ، خلائی تعاون ، پائیدار شہری ترقی ، افرادی قوت کی استعداد میں اضافے ، شعبہ معدنیات کی ترقی، موسمیاتی تبدیلی اور ویکسین بنانے کے شعبے شامل ہیں۔
