بہاولپور کی تحصیل احمدپور شرقیہ سے تعلق رکھنے والے سابق ایم این اے علی حسن گیلانی کار حادثے میں جاں بحق ہوگئے۔ کار میں سوار چار افراد شدید زخمی ہوگئے جنہیں ٹی ایچ کیو اسپتال احمدپور شرقیہ منتقل کردیا گیا۔
ریسکیو کے مطابق علاقہ نبی پور احمد پورروڈ پر علی حسن گیلانی کی گاڑی تیز رفتاری کے باعث بے قابو ہو کر سڑک کنارے کھڑے منی ٹرک سے جا ٹکرائی جس کے باعث علی حسن گیلانی موقع پر جاں بحق ہوگئے جبکہ چار دوست اکبر خان، میاں سلطان، محمد حنیف اور جند وڈہ شدید زخمی ہوگئے جنہیں ابتدائی طبی امداد دیتے ہوئے ٹی ایچ کیو احمدپور شرقیہ منتقل کردیا گیا۔ دو ساتھیوں کی حالت تشویشناک بتائی جارہی ہے۔
علی حسن گیلانی کی میت اسپتال سے اہل خانہ کے حوالے کردی گئی۔ آج شام چار بجے اوچ شریف میں نماز جنازہ ادا کی جائیگی۔
علی حسن گیلانی 2018 انتخابات میں مسلم لیگ ن کے ٹکٹ پر رکن قومی اسمبلی منتخب ہوئے۔ بعد میں انہوں نے پاکستان پیپلز پارٹی میں شمولیت اختیار کرکے 2024 انتخاب میں پیپلزپارٹی کی ٹکٹ پر ہی حصہ لیا تھا۔
