اسلام آباد پولیس نے ڈی چوک احتجاج کے دوران گرفتار ہونے والے انیس پی ٹی آئی کارکنان کو انسداد دہشت گردی عدالت میں پیش کر کے چار روزہ جسمانی ریمانڈ حاصل کر لیا۔
اسلام آباد کی انسداد دہشت گردی عدالت میں ڈی چوک احتجاج کے دوران گرفتار انیس پی ٹی آئی کارکنان کو رات دیر گئے پیش کیا گیا۔ ملزمان کو عدالت میں رات ساڑھے 10 بجے پیش کرنے پر جج طاہر عباس سپرا نے تفتیشی افسر طارق خان کو شوکاز نوٹس جاری کرتے ہوئے تین روز میں جواب جمع کرانے کا حکم دیا۔
عدالت نے رات ساڑھے 10 بجے ملزمان کو پیش کرنے پر تھانہ سیکرٹریٹ کے تفتیشی افسر کو شوکاز نوٹس جاری کر دیا۔ عدالت کو بتایا گیا کہ ملزمان کو تاخیر سے پیش کرنے کی وجہ امن و امان کی صورتحال کو کنٹرول کرنا تھا۔
تفتیشی افسر نے ملزمان کا 10 روزہ جسمانی ریمانڈ مانگا، تاہم عدالت نے چار روزہ جسمانی ریمانڈ کی منظوری دیتے ہوئے فیصلہ جاری کر دیا۔
پی ٹی آئی کارکنان کے خلاف تھانہ سیکرٹریٹ میں مقدمہ درج کیا گیا تھا۔ گرفتار کارکنان نے عدالت میں مؤقف اپنایا کہ وہ بے قصور ہیں اور ان کی گرفتاری کی کوئی ٹھوس وجہ نہیں بتائی گئی۔
