پاکستان نے ایک بار پھر افغان عبوری حکومت سے دہشت گرد گروپوں کے خلاف مؤثر کارروائی کا مطالبہ کردیا۔
ترجمان دفتر خارجہ ممتاز زہرا بلوچ نے ہفتہ وار نیوز بریفنگ میں کہا کہ افغانستان میں دہشت گرد تنظیموں کی موجودگی کےبار بار شواہد فراہم کیے ہیں۔ افغان عبوری حکومت ان دہشت گرد گروپوں کے خلاف مؤثر کارروائی کرے اور یقینی بنائے کہ دہشت گرد گروپس مستقبل میں افغان سرزمین کا پاکستان کے خلاف استعمال نہ کریں۔
ترجمان دفتر خارجہ نے بتایا کہ اقوام متحدہ کی جنرل اسمبلی اجلاس میں وزیراعظم شہباز شریف کی شرکت کا امکان ہے اس بارے میں تفصیلات بعد میں جاری کی جائیں گی۔ ممتاز زہرہ بلوچ نے مزید کہا پاکستان نے ہمیشہ کشمیریوں کے حق خود ارادیت کی بات کی ۔ مسئلہ کشمیر کا حل سلامتی کونسل کی قراردادوں کےذریعے ہی ممکن ہے۔
ترجمان نے اسرائیلی مغربی کنارے پر مظالم کی مذمت کی اور سلامتی کونسل سے مطالبہ کیا کہ اسرائیلی قابض افواج کے عام شہریوں کے خلاف مظالم کو روکا جائے۔
