چیمپئنز ون ڈے کپ کی ٹیم کراچی ڈولفنز کے مینٹور اور پاکستان کرکٹ ٹیم کے سابق سرفراز احمد کا کہنا ہے کہ پاکستان ٹیم پر مشکل وقت ہے ہمیں سب کو مل کر سپورٹ کرنا چاہیے ۔
لاہور میں پریس کانفرنس کرتے ہوئے کراچی ڈولفنز کے مینٹور سرفراز احمد کا کہنا تھا کہ میں ڈولفنز کی ٹیم کا مینٹور ہوں اور ہماری ٹیم کا سنٹر کراچی ہوگا، ہم نے ایک اچھی ٹیم تیار کی ہے اور امید کرتے ہیں کہ ایسے کھلاڑی دیں گے جو مستقبل میں پاکستان کی نمائندگی کریں ۔
سرفراز احمد کا کہنا تھا کہ پاکستان کرکٹ بورڈ ( پی سی بی ) اور ہمارا یہی ویژن ہے کہ ڈومیسٹک کے پرفارمر پاکستان کی طرف سے کھیلیں، ہم کپتان وہ تیار کریں گے جو مستقبل میں پاکستان میں کام آسکے اور ہم کوشش کریں گے کہ پاکستان کیلئے 25 سے 30 کھلاڑی کا بیک آپ پاکستان ٹیم کو تیار کر دیں۔
ان کا کہنا تھا کہ ہم نے جو کھلاڑی سلیکٹ کیے ان کا انتخاب کافی سوچ سمجھ کر کیا ہے، ٹیم میں انڈر 19 سمیت ڈومیسٹک کے کھلاڑی بھی شامل ہیں، سب مینٹورز کا ایک ہی ویژن ہے کہ پاکستان کرکٹ کو بہتر کریں ۔
انہوں نے کہا کہ میں قومی ٹیم میں کھیلنے کیلئے دستیاب ہوں اور مینٹور شپ بھی جاری رکھوں گا، چیمپئن کپ کی ٹیم کی طرف سے کھیلوں گا لیکن قیادت شاید نہ کروں، پی سی بی فٹنس ٹیسٹ کیلئے بلائے گا تو ضرور جاؤں گا، احمد شہزاد اور عمر اکمل کو کرکٹ کھیلنی چاہیے لیکن یہ ان کو فیصلہ کرنا ہوگا کہ وہ کرکٹ کھیلنا چاہتے ہیں یا نہیں ۔
ان کا مزید کہنا تھا کہ پاکستان ٹیم پر مشکل وقت ہے ہمیں سب کو مل کرسپورٹ کرنا چاہیے، مشکل وقت کے بعد پاکستان ٹیم ہمیشہ کھڑی ہوئی ہے ، پرامید ہیں کہ مسقبل میں چیزیں بہتر ہوجائیں گی۔
