انٹرنیشنل کرکٹ کونسل (آئی سی سی) نے نئی ٹیسٹ پلیئرز رینکنگ جاری کردی۔
پاکستانی بلے باز بابر اعظم کی ٹیسٹ رینکنگ میں 6 درجے تنزلی ہوئی ہے، وہ تیسرے سے نویں نمبر پر چلے گئے۔ محمد رضوان کی سات درجے رینکنگ میں بہتری ہوئی ہے، رضوان اور آسٹریلوی کھلاڑی عثمان خواجہ کے یکساں پوائنٹس ہیں اور یہ دونوں دسویں اور گیارہویں نمبرپر موجود ہیں۔
بیٹرز کی ٹیسٹ رینکنگ میں انگلینڈ کے جو روٹ کا پہلا نمبر برقرار ہے، جب کہ نیوزی لینڈ کے کین ولیمسن دوسرے نمبر پر برقرار ہیں، نیوزی لینڈ کے ہی ڈیرل مچل تیسرے نمبر موجود ہیں۔ انگلینڈ کے بیٹر ہیری بروک تین درجے ترقی کے بعد چوتھے نمبر پر آگئے ہیں۔
ٹیسٹ بولرز میں بھارت کے روی چندرن ایشون کا پہلا نمبر برقرار ہے، پاکستان کے شاہین آفریدی دو درجے تنزلی کے بعد 10 ویں نمبر پر آ گئے۔ ٹیسٹ آل راؤنڈرز میں بھارت کے رویندرا جڈیجہ کا پہلا نمبر برقرار ہے۔
ٹی ٹونٹی بیٹرز رینکنگ میں آسٹریلیا کے ٹریوس ہیڈ بدستور پہلے نمبر پر براجمان ہیں جبکہ پاکستان کے بابراعظم پانچویں اور محمد رضوان چھٹے نمبر موجود ہیں۔ ٹی ٹونٹی آل راؤنڈرز میں آسٹریلیا کے مارکس اسٹوئنس کا پہلا نمبر برقرار ہے۔
ٹی ٹونٹی بولرز میں انگلینڈ کے عادل رشید کا پہلا نمبربرقرار ہے، ویسٹ انڈیز کے عقیل حسین چار درجے ترقی کے بعد دوسرے نمبر پر آ گئے۔ ویسٹ انڈیز کے گودا کیش موتی 10 درجے ترقی کے بعد تیسرے نمبر پر آ گئے، شاہین آفریدی دو درجے ترقی کے بعد 13 نمبر پر موجود ہیں۔
