بنگلادیش میں سابق وزیراعظم شیخ حسینہ واجد کی حکومت کا تختہ الٹنے والے طلبہ مظاہرین نے اپنی سیاسی جماعت بنانے کا فیصلہ کرلیا ہے۔
غیر ملکی میڈیا کی رپورٹ کے مطابق بنگلادیش میں طلبہ نے ملک کی 2 بڑی سیاسی جماعتوں کی جانب سے فوری انتخابات کا مطالبہ مسترد کردیا ہے ، طلبہ رہنماؤں کا کہنا ہے کہ وہ اپنی اصلاحات کو برقرار رکھنے کے لیے اپنی سیاسی جماعت بنانے پر غور کر رہے ہیں۔
انہوں نے مزید کہا کہ ان کا مقصد گزشتہ 15 برس کے دوران ہونے والی حکمرانی کے طرز عمل کو دوبارہ نہ دہرانا ہے، دوسری جانب مشیر خارجہ توحید حسین نے کہا ہے کہ طلبہ نے ابھی تک ٹیکنوکریٹس سے اپنے سیاسی منصوبوں پر بات نہیں کی۔
انہوں نے مزید کہا کہ سیاسی منظر نامے کو بدلنا ہے کیونکہ ہم نے بنیادی طور پر نوجوان نسل کو سیاست سے باہر کر دیا ہے۔
واضح رہے کہ بنگلادیش میں طلبہ کے شدید احتجاج کے نتیجے میں سابق وزیراعظم حسینہ واجد مستعفی ہوکر بھارت فرار ہوچکی ہیں جبکہ ڈاکٹر یونس کی سربراہی میں عبوری حکومت قائم ہوچکی ہے۔
