وزیر اعلیٰ خیبرپختونخوا علی امین گنڈا پور نے قومی ہیرو ارشد ندیم کے لئے 50 لاکھ روپے انعام کا اعلان کر دیا۔
پشاور میں یوم آزادی کے موقع پر منعقدہ تقریب سے خطاب کرتے ہوئے وزیر اعلیٰ خیبر پختونخوا علی امین گنڈا پور کا کہنا تھا کہ ارشد ندیم ہمارا فخر ہے، ارشد ندیم کے لیے 50 لاکھ روپے کا اعلان کرتا ہوں۔
وزیر اعلیٰ خیبر پختونخوا کا کہنا تھا کہ ارشد ندیم کو عوام کے ٹیکس سے نہیں بلکہ ذاتی تنخواہوں اور دوستوں کی مدد سے انعام دونگا ، ان کو دعوت دیتا ہوں کہ خیبرپختونخوا میں کھلاڑیوں کو ٹپس اور ٹریننگ دیں۔
علی امین گنڈا پور کا کہنا تھا کہ ہم نے بجٹ مختص کیا ہے نوجوانوں کو پورا موقع دیا جائے گا، کھلاڑیوں کی کوچنگ کے لئے مزید کوچز لائیں گے۔
ان کا کہنا تھا کہ نوجوانوں کو منشیات سے بچانا ہے، یہ کھلاڑیوں کی ذمہ داری ہے کہ برائی کا مقابلہ کریں۔
انہوں نے کہا کہ مجھے فخر ہے کہ کھیل کے میدان میں نوجوان آگے آ رہے ہیں، ہمارے نوجوان پوری دنیا میں ملک کا نام روشن کریں گے ۔
