وزیراعظم شہبازشریف کی جانب سے دیئے گئے ارشد ندیم کے اعزاز میں عشائیے کے دوران قومی ہیرو کی اہلیہ نے پہلی مرتبہ اپنے جذبات کا اظہار کر دیا ہے ۔
گزشتہ روز قومی ہیرو ارشد ندیم کے اعزاز میں وزیراعظم شہباز شریف کی جانب سے وزیراعظم ہاوس اسلام آباد میں پروقار تقریب کا اہتمام کیا گیا جس میں وفاقی وزراء اور ارشد ندیم کے اہلخانہ بھی شریک تھے۔تقریب کی خاتون میزبان کی جانب سے ارشد ندیم کی اہلیہ سے پوچھا گیا کہ آپ کتنا پرامید تھیں کہ ارشد گولڈ میڈل جیت لیں گے؟ جس کا مختصر سا جواب دیتے ہوئے ارشد ندیم کی اہلیہ کا کہنا تھا ’بہت زیادہ‘۔
پروگرام کے دوسرے میزبان کی جانب سے ارشد ندیم کی اہلیہ سے پوچھا گیا کہ جب اتنے بڑے ایونٹ میں ارشد ندیم تھرو پھینک رہے تھے تو کیا آپ کو بھی ٹینشن تھی؟ قومی ہیرو کی اہلیہ کا کہنا تھا ٹینشن تو ہو رہی تھی لیکن دعا بھی کر رہی تھی کہ اللہ پاک ارشد کو کامیاب کریں اور وہ پاکستان کیلئے گولڈ میڈل لیکر آئیں ، پوری پاکستانی قوم کی بھی دعائیں ان کے ساتھ تھیں، ان کے والدین کی بھی اور ہماری بھی دعائیں ان کے ساتھ تھیں۔ ایک سوال کے جواب میں ارشد ندیم کی اہلیہ کا کہنا تھا کہ جب کبھی ارشد ندیم ہمت ہارتے تھے تو ہم ان کی ہمت باندھتے تھے اور ان سے کہتے تھے کہ آپ نے ہمت نہیں ہارنی، آپ کے پیچھے پوری قوم کے ماں باپ کی دعائیں ہیں تو پھر ان کا حوصلہ بڑھ جاتا تھا۔
