پاکستان کرکٹ بورڈ ( پی سی بی) کی جانب سے ورلڈ گیمزمیں شاندار کارکردگی پر بلائنڈ کرکٹ ٹیم میں انعامات تقسیم کیے گئے۔
پی سی بی کی جانب سے جاری بیان کے مطابق پاکستان کرکٹ بورڈ کی مینجمنٹ کمیٹی کے چیئرمین ذکا اشرف سے ورلڈ گیمزمیں شاندار کارکردگی دکھانے والی بلائنڈ کرکٹ ٹیم کے کھلاڑیوں اور آفیشلز نے ملاقات کی ۔
ذکا اشرف نے ٹیم کو انٹرنیشنل بلائنڈ اسپورٹس فیڈریشن ورلڈ گیمز میں طلائی تمغہ جیتنے پر مبارک باد دی اور ٹیم کی شاندار کارکردگی پر ہر کھلاڑی اور آفیشل کو تین تین لاکھ روپے کا چیک پیش کیا۔
چیئرمین پی سی بی ذکا اشرف نے ملاقات کرنے والوں سے گفتگو کرتے ہوئے کہا کہ بلائنڈ کرکٹ ٹیم کی یہ شاندار کامیابیاں یہ ثابت کرتی ہیں کہ ہمارے کھلاڑی ہر چیلنج کا مقابلہ کرکے بہترین کارکردگی دکھانے کی بھرپور صلاحیت رکھتے ہیں، پاکستان کرکٹ بورڈ بلائنڈ کرکٹ کی سپورٹ جاری رکھے گا۔
واضح رہےکہ یہ گیمز برمنگھم میں منعقد ہوئے تھے جن میں پاکستان بلائنڈ ٹیم اپنی بھرپور مہارت دکھاتے ہوئے دو مرتبہ انڈیا کو شکست دیتے ہوئے چیمپئن بنی تھی۔
یاد رہے کہ یہ مقابلے ٹی ٹوئنٹی فارمیٹ کی بنیاد پر ہوئے تھے اور پاکستانی بلائنڈ ٹیم انگلینڈ،انڈیا، آسٹریلیا اور بنگلادیش کو شکست دیتے ہوئے ناقابل شکست رہی تھی،اس نے فیصلہ کن میچ میں انڈیا کو آٹھ وکٹوں سے ہرایا تھا۔
