اسلام آباد کی مقامی عدالت نے ایف آئی اے کی مزید 5 روزہ جسمانی ریمانڈ کی استدعا مسترد کرکے رؤف حسن کو جوڈیشل ریمانڈ پر جیل بھیج دیا۔
ایف آئی اے نے جسمانی ریمانڈ مکمل ہونے پر رؤف حسن اور دیگر ملزمان کو پیکا ایکٹ عدالت کے جوڈیشل مجسٹریٹ شبیر بھٹی کے سامنے پیش کیا اور مزید جسمانی ریمانڈ کی درخواست کی جو عدالت نے مسترد کر دی۔ پیکا ایکٹ عدالت نے پی ٹی آئی سیکرٹری اطلاعات سمیت 9 ملزمان کو جوڈیشل ریمانڈ پر جیل بھیج دیا۔
پی ٹی آئی وکیل علی بخاری نے رؤف حسن اور دیگر کی ضمانت کیلئے درخواستیں دائر کرتے ہوئے کہا آگے چھٹیاں ہیں ، نوٹس جاری کر دیں ۔ عدالت نے استدعا منظور کرتے ہوئے ضمانت درخواستوں پر ایف ائی اے کو کل کے لئے نوٹس جاری کر دیا ۔ دوران سماعت پی ٹی آئی رہنما عمر ایوب ، فیصل جاوید ، عامر ڈوگر اور شمیم فردوس بھی کمرہ عدالت میں موجود تھے۔
