وزیر اعظم شہباز شریف کا کہنا ہے کہ اللہ کے فضل و کرم سے پاکستان کی معیشت مستحکم ہے اور پاکستان ترقی کی جانب گامزن ہے۔
اتوار کو وزیر اعظم شہباز شریف نے دورہ کراچی کے دوران کراچی پورٹ ٹرسٹ میں اجلاس کی صدارت کی جس میں گورنر سندھ ، وزیر اعلیٰ سندھ اور وفاقی کابینہ ارکان شریک ہوئے جبکہ چیئرمین پی این ایس سی ، پی کیو اے اور کے پی ٹی کے نمائندگان نے بھی اجلاس میں شرکت کی۔
اجلاس کے دوران وزیر اعظم کو بندرگاہوں اور نیشنل فلیگ کیرئیر پاکستان نیشنل شپنگ کارپوریشن پر تفصیلی بریفنگ دی گئی جبکہ شہباز شریف نے کراچی پورٹ ٹرسٹ کو بندرگاہ کی کارکردگی رپورٹ پیش کرنے کی ہدایت بھی کی۔
اجلاس سے خطاب کرتے ہوئے وزیر اعظم شہباز شریف کاکہنا تھا کہ پاکستان جغرافیائی اعتبار سے خطے میں کلیدی اہمیت کا حامل ہے، دورہءِ قازقستان کے دوران روسی صدر اور وسط ایشیائی ممالک کے رہنماؤں سے ملاقات ہوئی۔
وزیرِ اعظم کا کہنا تھا کہ پاکستان وسط ایشیائی ریاستوں کیلئے سمندری تجارت کا سب سے موزوں راستہ فراہم کرتا ہے، وسط ایشیائی ریاستوں نے تجارت کیلئے پاکستان کی بندرگاہوں کے استعمال میں گہری دلچسپی کا اظہار کیا ہے۔
شہباز شریف کا کہنا تھا کہ بندرگاہوں میں جدید نظام اور ان تک رسائی میں مزید بہتری ہے، پاکستان اربوں ڈالر کا زرمبادلہ حاصل کر سکتا ہے، کراچی میں موجود بندرگاہوں کی ترقی سے ویلیو ایڈیشن کی صنعت سے برآمدات میں اضافہ کریں گے۔
ان کا کہنا تھا کہ پورٹ قاسم اور کراچی پورٹ ٹرسٹ پر جدید آلات و مشنیری کی تنصیب ضروری ہے، جدید آلات پر مبنی مشنیری سےکسٹمز کلیئرینس کے وقت کو کم کرنے کیلئے اقدامات کئے جائیں اور بندرگاہوں پر اسکیننگ کی جدید مشینری کی جلد تنصیب یقینی بنائی جائے۔
انہوں نے کہا کہ بندرگاہوں کی استعداد سے مکمل فائدہ اٹھانے کیلئے ترجیحی بنیادوں پر اقدامات کئے جائیں، کراچی پورٹ ٹرسٹ تک اور اس سے سامان کی بلاتعطل ترسیل کو یقینی بنائیں، لیاری ایکپریس وے کو کارگو ٹریفک کیلئے 24 گھنٹے کھلا رکھا جائے اور سامان کی ترسیل کو مزید بہتر بنانے کیلئے ملیر ایکسپریس وے کو بندرگاہ سے جوڑا جائے۔
انہوں نے ہدایت کی کہ کراچی پورٹ تک اور اس سے ریل کے ذریعے سامان کی ترسیل کی استعداد کو بڑھایا جائے اور پورٹ قاسم پر ایل این جی جہازوں کی فیس کو کم کریں۔
وزیر اعظم کا کہنا تھا کہ فیس کم کر کے اسکو بین الاقومی سطح پر رائج ریٹس کے مطابق مقرر کیا جائے، شپنگ لائیز کی ریگیولیشن کیلئے ایک جامع لائحہ عمل بنا کر جلد پیش کیا جائے، پاکستان نیشنل شپنگ کارپوریشن اپنی لاگت کو کم کرے۔
ان کا مزید کہنا تھا کہ اللہ کے فضل و کرم سے پاکستان کی معیشت مستحکم ہے اور پاکستان ترقی کی جانب گامزن ہے۔
بزنس کمیونٹی سے ملاقات
شہباز شریف کے دورہ کراچی کے دوران کراچی پورٹ ٹرسٹ پر بزنس کمیونٹی نے بھی ان سے ملاقات کی جس میں قائم مقام صدر ایف پی سی سی آئی ثاقب فیاض مگوں نے وزیراعظم کو پورٹ پر پیش آنے والی مشکلات سمیت دیگر مسائل سے آگاہ کیا۔
قائم مقام صدرایف پی سی سی آئی ثاقب فیاض مگوں کا کہنا تھا کہ وزیر اعظم کو پورٹ پر پیش آنے والی مشکلات سے آگاہ کیا ہے اور پورٹ کے انفرا اسٹرکچر کو بہترکرنے کے بارےمیں کہا ہے۔
ثاقب فیاض کا کہنا تھا کہ وزیر اعظم نے پورٹ پر کلیئرنس میں تاخیر پر برہمی کا اظہارکیا اور کلیئرنس جلد کرنے کے لیے اسکینرز فوری لگانے کی ہدایت کی ہے۔
وزیراعظم نے اگلے ہفتے ایف پی سی سی آئی سے پورٹ پر بہتری کے لیےتجاویز بھی طلب کرلیں۔
