آسٹریلیا کے مایہ ناز فاسٹ باؤلر پیٹ کمنز نے رواں ٹی 20 ورلڈ کپ میں مسلسل دوسری ہیٹ ٹرک کا اعزاز حاصل کر کے تاریخ رقم کر دی۔
پیٹ کمنز ٹی 20 ورلڈ کپ میں لگاتار دو ہیٹ ٹرک کرنے والے دنیا کے پہلے باؤلر بن گئے ہیں۔ پیٹ کمنز نے افغانستان کے خلاف میچ میں یہ کارنامہ سر انجام دیا ۔
انہوں نے 18ویں اوور کی آخری بال پر راشد خان جبکہ 20 ویں اوور کی پہلی اور دوسری بال پر بالترتیب کریم جنت اور گلبدین نائب کی وکٹ حاصل کر کے ہیٹ ٹرک مکمل کی۔ پیٹ کمنز نے اس سے قبل بنگلہ دیش کے خلاف میچ میں بھی ہیٹ ٹرک کی تھی ۔
واضح رہے کہ مجموعی طور پر ٹی 20 ورلڈ کپ کی تاریخ میں یہ کارنامہ آٹھویں مرتبہ انجام دیا گیا ہے۔ پیٹ کمنز سے پہلے 2007 میں آسٹریلوی فاسٹ بالر بریٹ لی نے ٹی ٹوئنٹی کے افتتاحی ورلڈکپ میں بنگلہ دیش کے خلاف ہیٹ ٹرک کی تھی۔
