پاکستان بھر میں آج 12 ربیع الاول انتہائی عقیدت و احترام کے ساتھ منایا جا رہا ہے، نبی اکرم حضرت محمد صلی اللہ علیہ وسلم کی ولادت با سعادت کے موقع پر ملک بھر میں گلیاں، کوچے اور بلندعمارتیں سجا دی گئی ہیں۔
12 ربیع الاول کے مبارک موقع پر شہر شہر قریہ قریہ رنگ و نور سے مہک رہا ہے، فضائیں درود و سلام سے معطر ہیں، گھروں سے لے کر مساجد اور عمارتیں جگ مگ جگ مگ کررہی ہیں۔
ملک بھر کے تمام چھوٹے بڑے شہروں ،قصبوں اور دیہات میں عید میلاد النبیؐ کے جلوس برآمد ہوں گے، محافل درود و سلام منعقد ہوں گی اور پیغمبرِ امنؐ کا پیغام گھر گھر پہنچایا جائے گا۔
کراچی میں عیدمیلادالنبی مذہبی جوش وجذبے سےمنایا جارہاہے جلوس کےراستوں پر سیکیورٹی کے سخت انتظامات کیے گئے ہیں۔اطراف کی سڑکیں کنٹینرز لگا کر بند کردی گئیں۔
مختلف علاقوں میں موبائل فون سروس جزوی طور پرمعطل ہے پولیس کے 5 ہزار سے زائد اہلکار و افسران تعینات کیے گئے ہیں۔ مرکزی جلوس 3 بجے میمن مسجد ٹاورسےبرآمد ہوگا۔جلوس مقررہ راستوں سےہوتاہوانمائش پراختتام پذیرہوگا۔۔دعوت اسلامی کامرکزی جلوس3بجےپرانی سبزی منڈی سےنکلےگا
راولپنڈی میں جشن عید میلاد النبیﷺ کےمرکزی جلوس کی تیاریاں مکمل کرلی گئیں ہیں۔جلوس کا آغاز کچھ دیربعدمرکزی جامع مسجد کےسامنے سے ہو گا۔جلوس کی سیکیورٹی کےحوالےسےسخت انتظامات کیےگئے۔
سیرت کانفرنس
حکومت کی جانب سے 12 ربیع الاول کے موقع پر سیرت کانفرنس کے انتظامات کو حتمی شکل دے دی گئی ہے۔
نگران وفاقی وزیر مذہبی امور نے سماء کو بتایا کہ اس سال کانفرنس کا عنوان معاشی استحکام سیرت النبیؐ کی روشنی میں رکھا گیا ہے، عالمی مالیاتی اداروں سے چھٹکارا پانے، مائیکرو اور میکرو اکنامکس پر دانشور اپنی رائے دیں گے۔
سابق وزیر اعظم شہباز شریف کی مبارکباد
صدر مسلم لیگ (ن) اور سابق وزیر اعظم شہباز شریف نے تمام امت مسلمہ کو عید میلادالنبیﷺ کی مبارکباد پیش کی ہے۔
اپنے پیغام میں شہباز شریف کا کہنا تھا کہ نبی اکرمﷺ کی ولادت باسعادت اللہ تعالیٰ کی انسانیت پر خاص رحمت تھی ، اللہ تعالیٰ نے آپ ﷺ کو رحمت اللعالمین بنا کر بھیجا ، نبی اکرم ﷺ نے انسانیت کی فلاح ، دنیا وآخرت میں کامیابی کا ابدی نظام دیا۔
شہباز شریف کا کہنا تھا کہ دنیا کوظلم، جہالت اور مسائل سے نجات خاتم النبیین ﷺ کے اسوہ حسنہ سے ہی مل سکتی ہے ، آپ ﷺ نے نفرتوں، تقسیم اور جھگڑوں کو ختم کیا، ایک دوسرے کے خون کے پیاسوں کو بھائی بھائی بنا دیا۔
