چیف آف آرمی سٹاف جنرل سید عاصم منیر کی جانب سے پاکستان کرکٹ ٹیم کے اعزاز میں افطار عشائیہ دیا گیا ہے۔
پاک فوج کے شعبہ تعلقات عامہ ( آئی ایس پی آر ) کے مطابق آرمی چیف جنرل عاصم منیر کی جانب سے قومی کرکٹ ٹیم کے کھلاڑیوں کے اعزاز میں افطار عشائیہ کا اہتمام کیا گیا جبکہ عشائیے میں پاکستان کرکٹ بورڈ ( پی سی بی ) کے چیئرمین محسن نقوی بھی شریک ہوئے۔
افطار عشائیہ میں چیئرمین پی سی بی محسن نقوی کے علاوہ کرکٹ بورڈ کے دیگر حکام بھی شریک ہوئے۔
آئی ایس پی آر کے مطابق آرمی چیف کی جانب سے قومی کھلاڑیوں کیلئے مستقبل کی کوششوں میں نیک خواہشات کا اظہار کیا گیا۔
اس موقع پر کرکٹرز نے کاکول میں فراہم کی گئی بہترین تربیت اور کھیلوں کے فروغ میں تعاون پر پاک فوج کا شکریہ ادا کیا۔
پاکستان کرکٹ ٹیم نے کاکول میں آرمی سکول آف فزیکل ٹریننگ کیمپ میں تربیت حاصل کی تھی۔
