ایمازون کے بانی جیف بیزوس ایک بار پھر ایلون مسک کو پیچھے چھوڑتے ہوئے دنیا کے امیر ترین شخص بن گئے۔
غیر ملکی میڈیا رپورٹس کے مطابق بگ ٹیک ریلی کی بدولت جیف بیزوس ایک بار پھر دنیا کے امیر ترین شخص بن گئے ہیں اور انہوں نے ٹیسلا اور ایکس کے مالک ایلون مسک کو اس فہرست میں پیچھے چھوڑ دیا ہے۔
پیر تک بیزوس کے اثاثوں کی مجموعی مالیت 200 بلین ڈالر تھی جبکہ مسک 198 بلین ڈالر کے ساتھ ان سے پیچھے تھے۔
یہاں یہ بات قابل غور ہے کہ ٹیسلا کے سی ای او کو پچھلے سال کے دوران تقریباً 31 بلین ڈالر کا نقصان ہوا جبکہ بیزوس نے انڈیکس کے مطابق 23 بلین ڈالر کا فائدہ حاصل کیا۔
ایمازون کے حصص اس سال کی تاریخ میں 17% اور ایک سال پہلے کے مقابلے میں تقریبا 90% زیادہ ہیں۔
سی این این کی رپورٹ کے مطابق پیر کے روز ٹیسلا کے حصص کی قیمتیں 7 فیصد سے زیادہ گر گئیں۔
آکسفیم کی رپورٹ کے مطابق 2020 سے مہنگائی کے حساب سے دنیا کے پانچ امیر ترین افراد کی مجموعی مالیت میں 114 فیصد یا 869 بلین ڈالر کا اضافہ ہوا ہے۔
بلوم برگ بلینئر انڈیکس کے تازہ اعداد و شمار کے مطابق فرانسیسی بزنس مین برنارڈ آرنلٹ 197 بلین ڈالر کے ساتھ تیسرے امیر ترین ارب پتی ہیں جبکہ فیس بک کے سربراہ مارک زکربرگ چوتھے اور مائیکروسافٹ کے بانی بل گیٹس پانچویں نمبر پر موجود ہیں۔
مکیش امبانی ایشیا کے امیر ترین شخص قرار پائے ہیں جو 115 ارب ڈالر کے ساتھ گیارہویں پوزیشن پر ہیں۔
100 امیر ترین افراد میں بھارت سے 8 شخصیات شامل ہیں۔
