سام سنگ اپنے نئے ماڈل گلیکسی ایس 24 کی رونمائی آج (بدھ 17 جنوری کو) کرے گا، موبائل فون کمپنی اپنی گلیکسی سیریز کے نئے فونز میں آرٹیفیشل انٹیلجنس (اے آئی) کے ساتھ جڑے فیچرز متعارف کرانے جارہی ہے۔
ٹیکنالوجی ویب سائٹ ’سی نیٹ‘ کے مطابق سام سنگ سان جوشے کیلیفورنیا میں آج (بدھ کو) گلیکسی اَن پیکڈ ایونٹ میں اپنے نئے ماڈل گلیکسی ایس 24 کی رونمائی کرے گا۔
رپورٹ کے مطابق موبائل فون میں سام سنگ ہی کا تیار کردہ اے آئی ماڈل استعمال ہوگا، یہ اطلاعات بھی ہیں کہ آرٹیفیشل انٹیلجنس کا نظام اس کے ماڈل کے تمام فونز میں دستیاب ہوگا۔
سام سنگ نے نئے ماڈل کی رونمائی کی تقریب کے دعوت ناموں میں بھی یہ دعویٰ کیا کہ یہ اے آئی ٹیکنالوجی سے لیس اب تک کا ’ذہین ترین موبائل فون‘ ہوگا۔
سام سنگ ایس24 کی تقریب رونمائی امریکی وقت کے مطابق صبح 10 بجے سام سنگ یوٹیوب چینل پر لائیو نشر کی جائے گی۔
گزشتہ چند برسوں میں آرٹیفیشل انٹیلیجنس کے حامل فیچرز نے اسمارٹ فونز کے کیمروں اور تصویر کشی کو بہتر بنانے میں اہم کردار ادا کیا ہے لیکن اب موبائل فونز بنانے والی کمپنیاں ان فیچرز پر مزید کام کررہی ہیں۔
گزشتہ برس گوگل نے اپنا فون پِکسل 8 متعارف کرایا تھا، جس میں تصاویر کی کوالٹی اور ان کی ایڈیٹنگ کو بہتر بنانے کیلئے اے آئی ٹُولز موجود تھے۔ اب بتایا جارہا ہے کہ سام سنگ کے گاس اے آئی ماڈل کے علاوہ گلیکسی اے آئی کو بھی نئے فون ایس 24 کے ہینڈ سیٹس میں ضم کیا جائے گا اور 2024ء میں آنیوالے موبائل فونز میں بھی یہ سہولت دستیاب ہوگی۔
سام سنگ گلیکسی ایس 24 میں کیا کچھ ہوگا؟
اب تک سام سنگ کے اس نئے ماڈل کے بارے میں جو معلومات سامنے آئی ہیں، ان کے مطابق گلیکسی ایس 24 کے ڈیزائن میں کوئی خاص تبدیلی نہیں ہوگی تاہم کیمرے اور پروسیسر فیچرز میں معمول کی کچھ تبدیلیاں ہوں گی۔
سام سنگ گلیکسی ایس 24 میں سب سے بڑی تبدیلی جو متوقع ہے، وہ ہے اس ماڈل میں اے آئی سافٹ ویئر اور اس سے جڑی ٹرِکس۔ اس بارے میں کمپنی نے کچھ زیادہ تو نہیں بتایا لیکن کچھ عرصہ قبل یہ کہا گیا تھا کہ اس میں ’اے آئی لائیو ٹرانسلیشن‘ کا فیچر موجود ہوگا۔
سام سانگ کے ’جدید ترین اے آئی گلیکسی فون‘ کے نام سے ظاہر ہے کہ اس میں ایسا فیچر متوقع ہے جس سے بولتے ہوئے اسی وقت آڈیو اور ٹیکسٹ ٹرانسلیشن کی سہولت میسر ہوگی۔
یورپی ممالک میں اس نئے ماڈل کی قیمت میں بھی تبدیلی متوقع ہے، ’گلیکسی کلب‘ کی کچھ عرصہ قبل کی ایک رپورٹ میں کہا گیا تھا کہ ایس 24 اور ایس 24 پلس کی قیمت بالترتیب 899 (تقریباً 2 لاکھ 74 ہزار روپے) اور 1149 یورو (تقریباً تین لاکھ 50 ہزار روپے) ہوگی جبکہ سب سے زیادہ اسٹوریج کا حامل گلیکسی ایس 24 الٹرا 1449 یورو (تقریباً 4 لاکھ 40 ہزار روپے) میں دستیاب ہوگا۔
امریکا اور دیگر ممالک میں گلیکسی ایس 24 کی قیمت کیا ہوگی، اس بارے میں ابھی تفصیلات سامنے نہیں آئیں۔
