بھارتی فلم انڈسٹری کے معروف کلاسیکل گلوکار استاد راشد خان کینسر کے سبب55 سال کی عمر میں انتقال کرگئے۔
بھارتی میڈیا رپورٹس کے مطابق استاد راشد خان طویل عرصے سے کینسر کے مرض میں مبتلاتھے، اور کولکتہ کے نجی ہسپتال میں زیر علاج تھے ،ان کے دماغ میں خون کی کمی ہوگئی تھی جس کی وجہ سے انہیں گزشتہ سال 22 نومبر میں ہسپتال میں داخل کیا گیا تھا جہاں علاج کے دوران معلوم ہوا کہ ان کو کینسر کا عارضہ لاحق ہوگیا ہے۔
رپورٹس کے مطابق گزشتہ دنوں دوران علاج ہی راشد خان کی حالت تشویشناک ہوگئی تھی جس کے بعد انہیں وینٹی لیٹر پر منتقل کردیا گیا تھا، ایک ماہ تک وینٹی لیٹر پر رہنے کے بعد وہ 9 جنوری کو انتقال کرگئے۔انہوں نے سوگواران میں بیوہ اور دو بچے چھوڑے ہیں۔
راشد خان کے انتقال نے بھارتی میوزک انڈسٹری کو سوگوار کردیا ہے، بھارتی گلوکاروں سمیت پاکستانی گلوکار علی سیٹھی اور فرحان سعید نے بھی راشد خان کے انتقال پر گہرے دُکھ کا اظہار کیا۔
