امریکا میں ایک خاتون زہریلی مچھلی کھانے کے باعث ہاتھ اور پیروں سے معذور ہوگئی۔
امریکی ریاست کیلیفورنیا میں افسوسناک واقعہ پیش آیا، جہاں زہریلی مچھلی کھانے کے باعث ایک خاتون اپنے دونوں ہاتھوں اور پاؤں سے محروم ہوگئی ہے۔
سرپورٹ کے مطابق خاتون نے کچی ’تلاپیا مچھلی‘ کھائی جو زہریلے بیکٹیریا سے بھرپور تھی۔ نیویارک پوسٹ کی خبر کے مطابق اس خاتون کا نام لارا ہے جس کی عمر 40 برس ہے۔
لارا براجاس کئی مہینوں سے اسپتال میں داخل تھیں جس کے بعد جمعرات کو اُن کی سرجری ہوئی ہے اور ان کے دونوں ہاتھ اور پاؤں کاٹ دیئے گئے۔
خاتون کی دوست نے مقامی میڈیا کو بتایا کہ لارا نے یہ مچھلی سین ہوزے کی ایک مقامی مارکیٹ سے خریدی اور پھر گھر لا کر پکائی جس کے بعد وہ بیمار ہوگئیں۔
انہوں نے کہا کہ لارا اپنی زندگی سے تقریباً ہاتھ دھو بیٹھی تھیں، انہیں مصنوعی سانس لگانا پڑا، لارا کو ڈاکٹروں نے طبی کومے میں ڈال دیا، اُن کی انگلیاں، پاؤں اور ہونٹ سیاہ ہوگئے تھے اور اُن کے گردے کام کرنا چھوڑ رہے تھے۔
لارا کی دوست نے مزید انکشاف کیا کہ یہ مچھلی زہر آلود بیکٹریا ’وِبرِیو وُلنِیفیکس‘ سے بھرپور تھی، یہ بیکٹیریا سمندر کے پانی اور سی فوڈ میں پایا جاتا ہے۔
