ملک بھر میں شدید دھند کے باعث مختلف ایئر پورٹس سے آج بھی ملکی و غیر ملکی 22 پروازیں منسوخ کر دی گئیں ہیں۔
پاکستان انٹرنیشنل ایئر لائن ( پی آئی اے ) کے مطابق اسلام آباد سے دوحہ، دبئی اور مسقط جانے والی 3 پروازیں شدید دھند کے باعث منسوخ ہوئیں جبکہ اسلام آباد سے العین جانے والی پرواز پی کے 144، ابوظہبی جانے والی پرواز 262 بھی منسوخ کردی گئی۔
ایئر پورٹ حکام کے مطابق لاہور سے کوالالمپور جانے والی پرواز 898 اور 899 بھی نہ جا سکی جبکہ دبئی جانے والی پرواز پی کے 235، کوئٹہ جانے والی پروازیں پی کے 322 اور 323 بھی منسوخ ہو گئیں۔
علاوہ ازیں ملتان سے شارجہ جانے والی پروازیں 293 اور 294 اور پشاور سے مسقط، دبئی، دوحہ اور ابوظہبی کی 4 پروازیں بھی روانہ نہ ہو سکیں۔
دوسری جانب ریاض سے پشاور آنے والی اور پشاور سے ریاض جانے والی غیر ملکی ایئر لائن کی پرواز بھی منسوخ ہوگئی۔
