سری لنکن کرکٹ بورڈ کی جانب سے دھننجایا ڈی سلوا کو ٹیسٹ ٹیم کا نیا کپتان مقرر کر دیا گیا۔
سری لنکن ٹیم کے چیف سلیکٹر اپل تھرنگا نے بتایا کہ دھننجایا ڈی سلوا کو دیموتھ کرونارتنے کی جگہ ٹیسٹ ٹیم کا کپتان مقرر کر دیا گیا ہے اور بحیثیت کپتان ان کی پہلی اسائنمنٹ افغانستان کے خلاف 6 فروری سے شروع ہونے والا واحد ٹیسٹ میچ ہوگا۔
دیموتھ کرونارتنے نے 30 ٹیسٹ میچز میں لنکن ٹیم کی قیادت کی جن میں سے ان کو بحیثیت کپتان 12 میچز میں کامیابی ملی جبکہ 12 میں ناکامی اور چھ میچز ڈرا ہوئے۔
بورڈ کے حالیہ فیصلے کے بعد ڈی سلوا ٹیسٹ میچز میں سری لنکا کی قیادت کرنے والے 18 ویں کرکٹر بن جائیں گے۔
چیف سلیکٹر اپل تھرنگا نے کہا کہ میں تینوں فارمیٹس کے لیے ایک ہی کپتان کو ترجیح دیتا لیکن ہم اس وقت اپنے پاس موجود کھلاڑیوں کے ساتھ ایسا کرنے سے قاصر ہیں۔
51 ٹیسٹ میچز میں ڈی سلوا نے 10 سنچریوں کے ساتھ 39.77 کی اوسط سے 3,301 رنز بنائے ہیں اور 57.29 کی اوسط سے 34 وکٹیں حاصل کی ہیں، وہ 90 ون ڈے اور 39 ٹی ٹوئنٹی بھی کھیل چکے ہیں۔
