سپریم کورٹ کے رجسٹرار آفس نے بانی چیئرمین پی ٹی آئی کی توشہ خانہ کیس میں ہائیکورٹ کا فیصلہ معطل کروانے کیلئے دائر کی جانے والی اپیل اعتراضات عائد کرتے ہوئے واپس کر دی۔
بانی تحریک انصاف کی جانب سے دائر درخواست میں اسلام آباد ہائیکورٹ کا فیصلہ کالعدم قرار دینے کی استدعا کی گئی تھی اور مؤقف اپنایا گیا کہ توشہ خانہ کیس میں سزا پہلے ہی معطل ہو چکی ہے، ہائیکورٹ نے صرف سزا معطل کی ، پورا فیصلہ نہیں، ہائیکورٹ کے فیصلے میں غلطی کا الیکشن کمیشن نے فائدہ اٹھایا اور نااہلی کا نوٹیفیکیشن جاری کردیا۔
درخواست میں استدعا کی گئی کہ سپریم کورٹ توشہ خانہ کیس میں سزا پر مبنی فیصلہ معطل کرے تاکہ بانی پی ٹی آئی انتخابات میں حصہ لے سکیں۔
تاہم، سپریم کورٹ دفتر نے بانی پی ٹی آئی کی درخواست اعتراضات عائد کرتے ہوئے واپس کر دی اور کہا کہ اپیل کے ساتھ لف کیے گئے دستاویزات نا مکمل ہیں، تمام متعلقہ دستاویزات کے ہمراہ اپیل چھ جنوری تک دائر کی جا سکتی ہے۔
