لاہور کے علاقے باغبان پورہ میں نجی اسکول کی دیوار گرگئی،ملبے تلے دب کر ایک بچہ جاں بحق جبکہ پانچ بچے زخمی ہوگئے۔
سمر کیمپ میں موجود ڈھائی سو بچوں کو باحفاظت نکال کر آپریشن مکمل کرلیا گیا،حادثہ اسکول کی نئی خریدی گئی عمارت پر کچا لینٹر ڈالنے کے دوران پیش آیا۔
جاں بحق بچے کی عمر 12 سال، نام ابوبکر ہے،زخمیوں میں ندیم،وسیم،فیض اور شکیل شامل ہیں،ایک زخمی کی حالت تشویشناک ہے۔
ریسکیوذرائع کےمطابق عمارت کی زیرِتعمیر دیواریں گرنے سے بچوں کے اندر موجود ہونے کی اطلاع ملی، جس کے بعد امدادی کارروائیاں فوری طور پر شروع کی گئیں۔
دوسری جانب وزیرتعلیم پنجاب راناسکندرحیات نےاسکول میں غیرقانونی سمرکیمپ لگانےکا نوٹس لےلیا، رانا سکندرحیات نےضلعی ایجوکیشن اتھارٹی سے رپورٹ طلب کرلی،اسکول کے خلاف مکمل تحقیقات کی جائیں گی۔
ضلعی ایجوکیشن اتھارٹی نے 4 ایجوکیشن افسران کومعطل کردیا،معطل ہونےوالوں میں 2 اسسٹنٹ ایجوکیشن افسر،2ڈپٹی ایجوکیشن افسرشامل ہیں،ضلع ایجوکیشن اتھارٹی نے اسکول کو سیل کردیا
اسکول مالک کے خلاف ایف آئی آر کی درخواست دے دی گئی۔
