لاہور میں تیز ہواؤں کے ساتھ ہونے والی موسلا دھار بارش کے باعث شہر کے مختلف علاقوں میں درخت گرنے کے متعدد واقعات پیش آئے، جن سے ٹریفک کی روانی متاثر ہوئی جبکہ کئی گاڑیوں اور موٹر سائیکلوں کو بھی نقصان پہنچا۔
تفصیلات کے مطابق مال روڈ پر پل نہر کے قریب ایک بڑا درخت گر گیا، جس کے نتیجے میں ٹریفک کیبن اور ٹریفک پول بھی ٹوٹ گیا۔
تیز آندھی کے باعث گلبرگ اور کینال روڈ کے علاقوں میں بھی درخت گرنے کے واقعات رپورٹ ہوئے۔ گرنے والے درختوں کی زد میں آ کر متعدد موٹر سائیکلیں اور گاڑیاں متاثر ہوئیں۔
ٹریفک پولیس کے مطابق تمام واقعات میں خوش قسمتی سے کوئی جانی نقصان نہیں ہوا۔ متعلقہ اداروں کی ٹیمیں گرے ہوئے درخت ہٹانے اور ٹریفک کی روانی بحال کرنے میں مصروف ہیں۔
