کوئٹہ میں نواں کلی کے علاقے میں واقع ایک نجی میڈیکل اسٹور پر بچوں کو اینٹی الرجی انجکشن لگائے جانے کی اطلاعات سامنے آنے کے بعد ضلعی انتظامیہ نے کارروائی کرتے ہوئے میڈیکل اسٹور کو سیل کر دیا۔
ضلعی انتظامیہ کے مطابق سوشل میڈیا پر خبر وائرل ہونے کے بعد ڈپٹی کمشنر کوئٹہ مہراللہ بادینی نے فوری نوٹس لیا اور ڈرگ کنٹرولر ٹیم کو کارروائی کی ہدایت جاری کی۔حکام کے مطابق ڈرگ کنٹرولر ٹیم نے نواں کلی میں واقع نجی میڈیکل اسٹور پر چھاپہ مارا جہاں کارروائی کے دوران میڈیکل اسٹور کو سیل کر دیا گیا جبکہ تمام آلات اور متعلقہ سامان بھی ضبط کر لیا گیا۔
ضلعی انتظامیہ کا کہنا ہے کہ میڈیکل اسٹور کے مالک کے خلاف مقدمہ درج کر لیا گیا ہے اور مزید قانونی کارروائی جاری ہے۔انتظامیہ کے مطابق عوام کی جان و صحت کو خطرے میں ڈالنے والوں کے خلاف سخت قانونی کارروائی عمل میں لائی جا رہی ہے جبکہ انسانی جانوں سے کھیلنے والوں کے خلاف بلاامتیاز کارروائیاں جاری رہیں گی۔ضلعی انتظامیہ نے واضح کیا ہے کہ غیرقانونی طبی سرگرمیوں کی کسی صورت اجازت نہیں دی جائے گی اور قانون کی خلاف ورزی میں ملوث عناصر کے خلاف کریک ڈاؤن جاری رہے گا۔
