پاکستان سے عازمین حج کی روانگی کیلئے 34 روزہ حج فلائٹ آپریشن مکمل ہو گیا۔
حکام کے مطابق آخری حج پرواز پی کے 741 لاہور سے 290 عازمین کو لے کر جدہ روانہ ہوئی۔ حج کیلئے پہلی پرواز 18 اپریل کو لاہور سے روانہ کی گئی تھی۔
سرکاری حج اسکیم کے تحت مجموعی طور پر 468 پروازوں کے ذریعے ایک لاکھ 19 ہزار عازمین کو حجاز مقدس پہنچایا گیا۔ ان میں مدینہ منورہ کیلئے 186 جبکہ جدہ کیلئے 282 پروازیں چلائی گئیں۔
حج آپریشن کے دوران پاکستان کے 8 شہروں سے پروازیں آپریٹ کی گئیں۔ اسلام آباد سے 129، کراچی سے 124 اور لاہور سے 104 پروازیں عازمین کو سعودی عرب لے کر روانہ ہوئیں۔
اس کے علاوہ کوئٹہ سے 18، ملتان سے 34، سیالکوٹ سے 26، فیصل آباد سے 23 جبکہ سکھر سے 5 حج پروازیں چلائی گئیں۔حکام کے مطابق سرکاری اسکیم کے تحت 67 ہزار 230 مرد اور 51 ہزار 846 خواتین عازمین کو سعودی عرب پہنچایا گیا۔
حج آپریشن میں پی آئی اے سمیت سعودی فضائی کمپنیوں اور نجی ائیرلائنز نے بھی حصہ لیا۔
