آسٹریلیا کی بگ بیش لیگ کے ویمنز ایونٹ کا ٹائٹل ایڈیلیڈ اسٹرائیکر نے اپنے نام کرلیا، فائنل میں برسبین ہیٹ کو سنسنی خیز مقابلے میں 3 رنز سے شکست کا سامنا کرنا پڑا۔ امانڈا جیٹ ویلنگٹن پلیئر آف دی میچ اور چماری اتھاپتو سیریز کے بہترین کھلاڑی قرار پائیں۔
ویمنز بگ بیش لیگ کے فائنل میں ایڈیلیڈ اسٹرائیکرز نے اپنے ہوم گراؤنڈ پر ٹاس جیت کر بیٹنگ کا فیصلہ کیا اور مقررہ 20 اوورز میں 5 وکٹوں کے نقصان پر 125 رنز بنائے۔
لارا وولوارڈت 39 اور تاہیلا میگراتھ 38 رنز بنا کر نمایاں بیٹرز رہیں، بریجیٹ پیٹرسن 11، میڈیلین پنا 9 اور کیٹی میک 3 رنز بنا کر آؤٹ ہوئیں، امانڈا جیڈ ویلنگٹن 9 اور جارجیا ایڈمز 6 رنز بنا کر ناٹ آؤٹ رہیں۔
برسبین ہیٹ کی جانب سے نکولا ہین کوک نے 3، جارجیا وول اور جیس جوناسین نے ایک ایک کھلاڑی کو آؤٹ کیا۔
برسین ہیٹ 126 رنز ہدف کے تعاقب میں مقررہ 20 اوورز میں 8 وکٹوں کے نقصان پر 122 رنز ہی بناسکی اور میچ 3 رنز سے ہار گئی۔
امیلیا کیر ناقابل شکست 30 رنز بنا کر ٹاپ اسکورر رہیں، جارجیا ریڈمائن 22، چارلی ناٹ 20، گریس ہیرس 10 اور مگنون ڈو پریز 13 رنز بناسکیں۔
ایڈیلیڈ اسٹرائیکر کی جانب سے امانڈا جیڈ ویلنگٹن نے 16 رنز دے کر 3 کھلاڑیوں کو آؤٹ کیا اور میچ کی بہترین کھلاڑی قرار پائیں۔ تاہیلیا میک گراتھ اور میگن شٹ نے 2، 2 شکار کئے، جیما بارسبے ایک کھلاڑی کو آؤٹ کرسکیں۔
