وفاقی وزیر اطلاعات عطا تارڑ کا کہنا ہے کہ حالیہ دہشت گرد حملوں کے بعد پاک افغان سرحدی علاقوں میں مصدقہ انٹیلیجنس کی بنیاد پر جوابی کارروائی کی گئی جس میں دہشت گردوں کے اہم ٹھکانے، تربیتی مراکز اور کمانڈ نیٹ ورکس کو نشانہ بنایا گیا۔
عطا تارڑ نے ایکس پر بیان میں کہا ہے کہ حالیہ دہشت گرد حملوں کے بعد پاکستان نے پاک افغان سرحدی علاقوں میں بڑے پیمانے پر جوابی کارروائی کی جو مصدقہ انٹیلیجنس کی بنیاد پر کی گئی۔
انہوں نے بتایا کہ موسیٰ درہ میں ایف سی چوکی پر حملے کے بعد سیکیورٹی فورسز متحرک ہوئیں اور شمالی وزیرستان و بنوں میں دہشت گرد حملوں کے ذمہ دار عناصر کو نشانہ بنایا گیا۔
عطا تارڑ کے مطابق کارروائی میں بھارتی سرپرستی میں کام کرنے والے 26 خوارج ہلاک ہوئے جبکہ دہشت گردوں کے 4 اہم مراکز، تربیتی کیمپ، اسلحہ ڈپو اور خفیہ ٹھکانے تباہ کر دیے گئے۔
وفاقی وزیر اطلاعات نے مزید کہا کہ کمانڈرز اور ماسٹر مائنڈز کے نیٹ ورکس بھی نشانہ بنے جبکہ آپریشن انتہائی مہارت اور درستگی سے انجام دیا گیا۔ وفاقی وزیر نے واضح کیا کہ "عزمِ استحکام" کے تحت انسداد دہشت گردی مہم پوری قوت سے جاری رہے گی، شہریوں کا تحفظ اور قومی سلامتی حکومت کی اولین ترجیح ہے۔
