الیکشن کمیشن آف پاکستان نے سابق چیف جسٹس افتخارمحمد چوہدری کی سیاسی جماعت ڈی لسٹ کردی ہے جبکہ ایم کیو ایم کو انٹراپارٹی انتخابات کروانے کی مہلت دے دی گئی ہے۔
سابق چیف جسٹس افتخار محمد چوہدری کی جماعت پاکستان جسٹس اینڈ ڈیموکریٹک پارٹی کو مسلسل عدم پیشی اور انٹرا پارٹی انتخابات نہ کروانے پر ڈی لسٹ کر دیا گیا۔ چیف الیکشن کمشنر سکندر سلطان راجہ کی سربراہی میں تین رکنی بینچ نے سماعت کے دوران ریمارکس دیے کہ پارٹی کو متعدد مواقع دیئے گئے لیکن وہ پیش نہ ہوئی۔
دوسری جانب متحدہ قومی موومنٹ کے انٹرا پارٹی انتخابات کیس میں کمیشن نے جماعت کو اکتوبر 2026 تک انتخابات کروانے کی مہلت دے دی ہے۔
سماعت کے دوران پارٹی کی جانب سے فروغ نسیم پیش ہوئے، جبکہ ڈی جی پولیٹیکل فنانس نے بینچ کو بریفنگ میں بتایا کہ ایم کیو ایم پہلے بھی مقررہ وقت میں انتخابات نہیں کروا سکی۔ پارٹی نے انتخابی فہرستوں کی تکمیل کے لیے مزید وقت مانگا تھا۔
الیکشن کمیشن آف پاکستان نے استحکام پاکستان تحریک کو بھی قواعد کی خلاف ورزی پر سیاسی جماعتوں کی فہرست سے نکالنے کا حکم دے دیا۔
