وزیرِاعظم شہباز شریف سے سعودی عرب کے وزیر خزانہ محمد بن عبداللہ الجدعان نے ملاقات کی۔ نائب وزیرِاعظم اسحاق ڈار اور فیلڈ مارشل جنرل عاصم منیر بھی شریک تھے۔ دو طرفہ تعلقات کو مزید مضبوط بنانے کے مشترکہ عزم کا اعادہ کیا گیا۔ وزیراعظم شہباز شریف نے معزز مہمان کے اعزاز میں عشائیہ بھی دیا۔
وزیرِاعظم شہباز شریف اور سعودی وزیرخزانہ محمد بن عبداللہ الجدعان کی ملاقات اسلام آباد میں ہوئی۔ وزیرِاعظم نے خادم الحرمین الشریفین شاہ سلمان اور ولی عہدمحمد بن سلمان کیلئے نیک تمناؤں کا اظہار کیا۔ شہباز شریف نے ولی عہد محمد بن سلمان سے حالیہ خوشگوار ٹیلیفونک گفتگو کا حوالہ دیا۔ پاکستان کیلئے سعودی ولی عہد کی گہری محبت اور اقتصادی و مالی معاونت کو بھی سراہا۔ کہا پاکستان ہر مشکل وقت میں سعودی عرب کے ساتھ کھڑا رہا ہے۔
دونوں ممالک کے درمیان یہ مضبوط رشتہ ولی عہد کی سرپرستی میں مزید مستحکم ہوا۔ پاکستان سعودی عرب کےساتھ تمام شعبوں میں تعاون کومزید وسعت دینے کیلئے پرعزم ہے۔ عبداللہ الجدعان نے کہا کہ سعودی عرب پاکستان کے ساتھ دیرینہ اور برادرانہ تعلقات مزید مضبوط بنانےکیلئے پرعزم ہے۔
وزیراعظم شہبازشریف نے سعودی وزیرخزانہ کے اعزاز میں عشائیہ بھی دیا۔۔ ذرائع کے مطابق سعودی وزیر خزانہ نے امریکا ایران مذاکرات کا خیرمقدم کیا۔ جبکہ پاکستان کی جانب سے خطے میں امن واستحکام کیلئے تعمیری کردار جاری رکھنے کے عزم کا اعادہ کیا گیا۔
