ہائی اوکٹین فیول پر پیٹرولیم لیوی میں اضافے کے بعد وزیراعظم شہبازشریف نے ایک اور اہم فیصلہ کرتے ہوئےسرکاری گاڑیوں میں ہائی اوکٹین ایندھن کے استعمال پر پابندی عائد کر دی۔
وزیراعظم شہبازشریف کےسنگین عالمی صورتحال کےپیش نظربچت اقدامات جاری ہیں،ہائی اوکٹین فیول پر پیٹرولیم لیوی میں اضافےکےبعد اس کےسرکاری گاڑیوں میں استعمال پر پابندی عائدکردی،فیصلےکا اطلاق فوری طورپرہوگا،وفاقی وزارتوں اورڈویژنزکےعلاوہ تمام محکموں،اتھارٹیز اور ذیلی اداروں کو بھی فوری عملدرآمد کا حکم دیدیا گیا ۔
شہبازشریف نےکہا سرکاری پیسے سےہائی اوکٹین کےاستعمال پرمکمل پابندی ہوگی،کسی سرکاری گاڑی میں ہائی اوکٹین ناگزیر ہو تو استعمال کرنے والا جیب سے ڈلوائے،فیصلے کا مقصد قومی وسائل کا مؤثر اور ذمہ دارانہ استعمال یقینی بنانا ہے،غیرضروری اخراجات میں کمی لانا وقت کی اہم ضرورت ہے،خلاف ورزی کی صورت میں سخت کارروائی عمل میں لائی جائے۔ اس اقدام سے حکومتی اخراجات میں کمی ہو گی ۔
اوگرا کےمطابق وزیراعظم کی ہدایت پر ہائی اوکٹین پر پیٹرولیم لیوی میں 200 روپے فی لیٹر اضافہ کیا گیا ہے،ہائی اوکٹین پر پیٹرولیم لیوی 105 روپے 35 پیسے فی لیٹر سے بڑھا کر 305 روپے 37 پیسے فی لیٹر کر دی گئی،لیوی میں اضافے کے بعد ہائی اوکٹین کی قیمت 534 روپے فی لیٹر ہو گئی،پیٹرول ، ہائی اسپیڈ ڈیزل پر پیٹرولیم لیوی برقرار رکھی گئی ہے ۔
