وزیراعظم کے مشیر برائے سیاسی امور رانا ثنا اللہ کا کہنا ہے کہ پاکستان کو پوری دنیا میں ایسا مقام اور اہمیت حاصل ہے جو پہلے کبھی نہیں تھی۔ آج پاکستان عالمی اسلام میں اتفاق اور اتحاد کی امید کی علامت ہے۔
فیصل آباد میں میڈیا سے گفتگو میں رانا ثنا اللہ نے کہا کہ پاکستان نے ایران پر ہونے والی جارحیت کی مذمت کی، اپنے بھائی ملک کے ساتھ کھڑے ہوئے، ان کے سپریم لیڈرکی شہادت پر اظہار افسوس کیا۔ ایران کی جانب سے ہمسایہ ممالک پر حملہ کی بھی مذمت کی۔
رانا ثنا اللہ نے کہا کہ فیصل آباد:پاکستان اس وقت مختلف چیلنجز کا سامنا کر رہا ہے، اندرونی اور بیرونی مسائل کا سامنا ہے، پاکستان نہ تو افغانستان پر جنگ مسلط کرنا چاہتا ہے اور نہ ہی افغانستان کے کسی بھی علاقے پر قبضہ چاہتا ہے۔ ہمارا حق ہے بین الاقوامی قوانین کے مطابق کسی بھی ملک کی سر زمین دہشتگری کے استعمال نہ ہو۔
انہوں نے کہا کہ افغانستان میں دہشتگردی کی ٹریننگ دی جاتی ہے جس میں اسرائیل اور انڈیا شامل ہے، آپریشن اس وقت جاری رہے گا جب تک افغانستان میں دہشت گردوں کی کمین گاہیں رہیں گی۔ ایک بار تو ان کمین گاہوں کو ختم کر دیا گیا ہے اس پر نظر رکھی جائے گی کہ دوبارہ نہ ہو۔
لیگی رہنما نے کہا کہ دنیا میں کہیں کوئی معاملہ بنے تو ہم اپنے ملک میں جلاو گھیراو شروع کر دیتے ہیں، کسی ایک فرقہ کے خلاف نہیں سب کو مساوی اور برابری کے حقوق ہیں۔
انہوں ںے کہا کہ پی ٹی آئی ڈیل کیلئے تیار ہیں مگر سیاسی عمل چلانے کیلیے تیار نہیں ہیں ، ڈیل کی کوئی گنجائش نہیں ہے، بانی پی ٹی آئی کے بیٹے اگر صرف والد سے ملاقات کیلئے آرہے ہیں تو سہولت دی جا سکتی ہے اگر ان کا مقصد پاکستان کے خلاف مہم جوئی ہے تو اس کی قانون میں اجازت نہیں۔
