میٹا نے انٹرنیٹ صارفین کو مقبول ترین سوشل میڈیا پلیٹ فارم فیس بک سے کمانے کا نیا ذریعہ فراہم کیا ہے۔
میٹا کی جانب سے ایک نیا پروگرام متعارف کرایا گیا ہے جس کا مقصد ٹک ٹاک اور یوٹیوب میں مقبول صارفین کو فیس بک پر لانا ہے۔ اس مقصد کے لیے میٹا کی جانب سے بہترین آمدنی اور زیادہ صارفین تک رسائی کی پیشکش کی جائے گی۔
کریٹیر فاسٹ ٹریک پروگرام ٹک ٹاک یا یوٹیوب میں مقبول افراد کو فیس بک میں ماہانہ آمدنی اور زیادہ صارفین تک رسائی فراہم کرے گا۔
اگر آپ کے انسٹا گرام، ٹک ٹاک یا یوٹیوب پر ایک لاکھ فالوورز ہیں تو فیس بک فاسٹ ٹریک پروگرام کے تحت آپ کو ایک ہزار ڈالرز ماہانہ دیے جائیں گے جبکہ 10 لاکھ سے زائد فالوورز پر 3 ہزار ڈالرز ماہانہ ادا کیے جائیں گے۔ مگر شرط یہ ہوگی کہ آپ اپنی ویڈیوز یا مواد کو فیس بک پر پوسٹ کریں۔
اس پروگرام کے تحت 3 ماہ تک ایک سے 3 ہزار ڈالرز یقینی طور پر صارفین کو ملیں گے مگر کمپنی کے مطابق 3 ماہ بعد کریٹیرز کو فیس بک کونٹینٹ مونیٹائزیشن پروگرام تک رسائی فراہم کی جائے گی جبکہ زیادہ افراد تک رسائی کا سلسلہ برقرار رہے گا۔ یہ اعلان میٹا کی جانب سے زیادہ افراد کو فیس بک پر لانے کی کوششوں کا حصہ ہے۔
کمپنی کے مطابق 2025 میں اس کی جانب سے صارفین کو 3 ارب ڈالرز ادا کیے گئے جو کہ 2024 کے مقابلے میں 35 فیصد زیادہ تھے۔ ان میں سے 60 فیصد ادائیگیاں ریلز مواد پر کی گئیں۔
فاسٹ ٹریک پروگرام کا حصہ بننے کے خواہشمند افراد کو فیس بک میں 30 دن کے اندر کم از کم 15 ریلز کو شیئر کرنا ہوگا اور یہ تمام ویڈیوز کم از کم 10 مختلف دنوں میں پوسٹ کرنا ہوں گی۔ ضروری نہیں کہ یہ مواد صرف فیس بک کے لیے محدود ہو، مگر صارف کا اپنا تیار کردہ مواد ہونا ضروری ہوگا، چاہے اسے آرٹی فیشل انٹیلی جنس کی مدد سے کیوں نہ تیار کیا گیا ہو۔
واضح رہے کہ فیس بک کے صارفین کی تعداد 3 ارب سے زیادہ ہے مگر اسے اکثر مقبول کریٹیرز کو اپنی جانب کھینچنے میں مشکلات کا سامنا ہوتا ہے جو ٹک ٹاک اور یوٹیوب کو زیادہ ترجیح دیتے ہیں۔
