اسلام آباد پولیس کے ترجمان نے 13 مارچ 2026 بروز جمعہ کے لیے ٹریفک ایڈوائزری جاری کرتے ہوئے شہریوں کو متبادل راستے اختیار کرنے اور غیر ضروری سفر سے گریز کرنے کی ہدایت کی ہے۔
ترجمان کے مطابق ریڈ زون جانے کے لیے صرف مارگلہ روڈ کھلا ہوگا جبکہ دیگر تمام داخلی راستے بند رہیں گے۔ اسی طرح ایران ایونیو آنے اور جانے والے تمام راستے بھی بند رکھے جائیں گے۔
ٹریفک پولیس کے مطابق چاند تارہ فلائی اوور سے سری نگر ہائی وے کی جانب سرینا چوک تک سڑک بند رہے گی جبکہ آبپارہ سے سہروردی روڈ آنے اور جانے والی ٹریفک کے لیے بھی راستہ مکمل طور پر بند ہوگا۔
اسی طرح رجب طیب اردوان فلائی اوور سے جناح ایونیو، کلثوم پلازہ چوک، سیونتھ ایونیو پل اور فضل حق روڈ سے جیو چوک تک سڑک بند رہے گی۔
ایڈوائزری کے مطابق حاجی کیمپ چوک سے اسلام آباد چوک تک روڈ مکمل طور پر بند ہوگا جبکہ آئی جے پی روڈ گندم گودام سے فقیر ایپی روڈ تک بھی ٹریفک معطل رہے گی۔
مزید برآں نیسکام سے آئی ٹین کی طرف جانے والی سروس روڈ، آئی ایٹھ سے آئی جے پی ڈبل روڈ تک کے راستے بھی بند رہیں گے۔ راول ڈیم چوک سے کشمیر چوک تک کلب روڈ اور پارک روڈ پر شہزاد ٹاؤن سے مشرف چوک تک ایک سائیڈ بند رہے گی۔
اسلام آباد پولیس نے شہریوں سے اپیل کی ہے کہ وہ متبادل راستے اختیار کریں، غیر ضروری سفر سے گریز کریں اور سفر کے لیے اضافی وقت رکھ کر گھر سے نکلیں۔
شہری مزید معلومات کے لیے پکار 15 اور ٹریفک ہیلپ لائن 1915 پر رابطہ کرسکتے ہیں جبکہ تازہ ٹریفک صورتحال جاننے کے لیے اسلام آباد ٹریفک پولیس کے ایف ایم 92.4 سے بھی رہنمائی حاصل کی جا سکتی ہے۔
کراچی کے لیے ٹریفک پلان جاری
دوسری جانب یوم القدس کے موقع پر کراچی کے لیے ٹریفک پلان جاری کر دیا گیا، کراچی میں آج دوپہر 12 بجے سے مختلف سڑکیں بند کر دی جائیں گی۔ ٹریفک پولیس کے مطابق بوٹ بیسن سے جناح برج اور مائی کلاچی آنے جانے والی دونوں سڑکیں بند رہیں گی۔
ٹریفک پولیس نے بتایا ہے کہ پی آئی ڈی سی سے جناح برج اور ایم ٹی خان روڈ جانے والے دونوں ٹریک بھی بند رہیں گے، بوٹ بیسن سے مائی کلاچی آنے والے ٹریفک کو یوٹرن دے کر واپس بھیجا جائے گا۔
ٹریفک پولیس کے مطابق پی آئی ڈی سی سے جناح برج آنے والے ٹریفک کو کھجور چوک کی طرف موڑا جائے گا، جناح برج سے آنے والے ٹریفک کو آئی آئی چندریگر روڈ بھیجا جائے گا۔
