دنیا کے مقبول ترین سوشل میڈیا پلیٹ فارمز کی مالک کمپنی میٹا نے ایک نیا پلیٹ فارم خرید لیا ہے جو انسانوں کے لیے نہیں بلکہ بوٹس کے لیے ہے۔
کمپنی نے منگل کو ایک بیان میں کہا کہ اس نے مولٹ بک کو خرید لیا ہے، جو ایک ایسا سوشل میڈیا نیٹ ورک ہے جہاں اے آئی ایجنٹس خودمختار انداز میں ایک دوسرے سے رابطہ کرتے ہیں۔
مولٹ بک گزشتہ ماہ سیلیکون ویلی میں موضوعِ بحث بن گیا تھا، جہاں لانچ کے چند ہی دنوں میں لاکھوں بوٹس رجسٹرڈ ہو گئے۔ بعض ماہرین کے نزدیک یہ ایک بڑی پیش رفت تھی کیونکہ اس نے دکھایا کہ جب اے آئی ایجنٹس انسانوں کی طرح باہم میل جول کرتے ہیں تو کیا ممکن ہو سکتا ہے۔
تاہم کچھ ناقدین نے اسے جعلی ایجنٹس، اے آئی سے بنے کم معیار کے مواد اور سکیورٹی خدشات سے بھرپور قرار دیتے ہوئے احتیاط برتنے کا مشورہ دیا۔
میٹا نے یہ پلیٹ فارم ایسے وقت میں خریدا ہے جب چند ہفتے قبل اوپن اے آئی نے مولٹ بک کے پسِ منظر میں موجود ٹیکنالوجی کے بانی کو اپنی کمپنی میں شامل کر لیا تھا۔
