ناروے کے دارالحکومت اوسلو میں امریکی سفارت خانے کے قریب زوردار دھماکہ ہوا تاہم واقعے میں کسی جانی نقصان یا زخمی ہونے کی کوئی اطلاع موصول نہیں ہوئی ۔
عالمی میڈیا کے مطابق اوسلوکے مغربی حصے میں امریکی سفارت خانے کے قریب ایک زوردار دھماکے کی آواز سنی گئی جس کے بعد پولیس اور سکیورٹی اداروں کی بھاری نفری نے علاقے کو گھیرے میں لے لیا۔
اوسلو پولیس کی جانب سے جاری کردہ ایک ہنگامی بیان میں کہا گیا ہے کہ اس پراسرار دھماکے کی وجوہات تاحال معلوم نہیں ہو سکیں اور نہ ہی اب تک اس میں ملوث کسی گروہ یا فرد کی شناخت ہو پائی ہے۔
پولیس حکام نے مزید تفصیلات فراہم کرتے ہوئے بتایا کہ وہ اس وقت امریکی سفارت خانے کی انتظامیہ کے ساتھ قریبی رابطے میں ہیں اور اب تک کی اطلاعات کے مطابق اس واقعے میں کسی جانی نقصان یا زخمی ہونے کی کوئی اطلاع موصول نہیں ہوئی ہے۔
عینی شاہدین کے مطابق دھماکے کے فوری بعد سفارت خانے کی عمارت اور اس کے گرد و نواح سے دھوئیں کے بادل اٹھتے ہوئے دیکھے گئے جس نے علاقے میں سکیورٹی کے حوالے سے شدید تشویش پیدا کر دی ہے۔
