کراچی میں گیس لیکج کے باعث عمارت میں ہونے والے دھماکے سے اموات کی تعداد 16 ہوگئی۔ واقعے میں زخمی افراد کی تعداد 14 ہوگئی ہے۔
پولیس کے مطابق کراچی کے علاقے سولجر بازار میں صبح 4 بجے کے قریب عمارت میں گیس لیکج کے باعث دھماکا ہوا جس کے نتیجے میں 3 منزلہ رہائشی عمارت کی چھت گر گئی۔ حادثے کی اطلاع ملتے ہی اور ریسکیو اداروں نے سرچ آپریشن شروع کردیا۔
ریسکیو حکام کا کہنا ہے کہ عمارت 3 منزلہ ہے ، تنگ گلیوں کی وجہ سے ریسکیو آپریشن میں مشکلات کا سامنا رہا۔ جاں بحق و زخمی ہونے والوں میں بچے اور خواتین بھی شامل ہیں۔
حکام کے مطابق گیس دھماکا عمارت کی پہلی منزل پر ہوا، دھماکا گیس سلنڈر یا گیس کھینچنے والی مشین سے ہوا۔
وزیراعلیٰ سندھ نے سولجر بازار میں دھماکے کی وجوہات سے متعلق کمشنر کراچی کو تحقیقات کا حکم دے دیا ہے۔
وزیراعلیٰ سندھ کے ترجمان کی جانب سے جاری ہونے والے بیان میں کہا گیا ہے کہ وزیراعلیٰ نے سولجر بازار میں گیس لیکج کے باعث عمارت میں دھماکے کا نوٹس لیتے ہوئے قیمتی جانوں کے ضیاع پر گہرے دکھ اور افسوس کا اظہار کیا ہے اور متعلقہ اداروں کو ملبے تلے دبے افراد کو فوری نکالنے کی ہدایت کی ہے۔
بیان میں مزید کہا گیا ہے کہ وزیراعلیٰ سندھ کی ہدایت پر زخمیوں کو بہترین طبی سہولیات فراہم کی جائیں اور امدادی کارروائیوں میں تیزی لائی جائے۔
