لاہور کے علاقے رائیونڈ میں ایک خاتون اپنے چار بچوں کے ہمراہ مسجد کے مینار پر چڑھ گئی، جس سے علاقے میں خوف و ہراس پھیل گیا۔
ترجمان ڈولفن کے مطابق خاتون مالی مشکلات اور شوہر کے رویے سے دلبرداشتہ ہو کر یہ قدم اٹھایا۔ اطلاع ملتے ہی پولیس اور ڈولفن فورس کی ٹیمیں فوری طور پر موقع پر پہنچ گئیں اور امدادی کارروائی شروع کی۔
پولیس کے مطابق 30 سالہ اللہ بخشی زوجہ محمد اسلم شیراکوٹ لاہور کی رہائشی ہے۔ خاتون کے ساتھ اس کی 14 سالہ بیٹی آمنہ، 11 سالہ بیٹا اذان علی، 10 سالہ بیٹی علیزہ اور 8 سالہ بیٹی علینہ بھی موجود تھیں۔ بتایا گیا ہے کہ خاتون گھریلو لڑائی جھگڑے کے باعث شیراکوٹ سے رائیونڈ آئی تھی۔
ترجمان کے مطابق مقامی معززین اور پولیس کی مشترکہ کوششوں سے خاتون اور بچوں کو بحفاظت نیچے اتار لیا گیا۔ بعد ازاں انہیں حفاظتی تحویل میں لے کر قانونی اور سماجی پہلوؤں کا جائزہ لیا جا رہا ہے۔
