سپارکو نے خلابازوں کے انتخاب کے عمل میں ایک اور اہم سنگ میل عبور کر لیا۔ چین میں ہونے والے دوسرے مرحلے کے بعد دو امیدواروں کو حتمی تربیت کے لیے شارٹ لسٹ کر لیا گیا۔
آئی ایس پی آر کے مطابق ابتدائی اسکریننگ کے بعد دو امیدواروں کو چین کے آسٹروناٹس سینٹر میں طبی، نفسیاتی اور مہارتی معائنے کے لیے منتخب کیا گیا، جہاں ان کی مکمل جانچ کی گئی۔ شارٹ لسٹ کیے گئے دونوں امیدوار اب چھ ماہ کی جدید تربیت حاصل کریں گے، جس کے بعد ان میں سے ایک امیدوار کو چینی خلائی اسٹیشن کے مشن کے لیے فائنل کیا جائے گا۔
آئی ایس پی آر کے مطابق پاکستانی خلاباز کی متوقع پرواز اسی سال اکتوبر یا نومبر میں متوقع ہے۔ پاکستان اور چین کے درمیان خلا کے شعبے میں تعاون کا معاہدہ فروری دو ہزار پچیس میں طے پایا تھا۔ وزیراعظم شہباز شریف کے وژن اور حکومتی حمایت سے پاکستان کی خلائی پروگرام میں شمولیت ممکن ہوئی جبکہ پاکستان چین کے خلاباز پروگرام میں شراکت داری کرنے والا پہلا ملک ہے۔
