مشیر نجکاری محمد علی کی زیرصدارت نجکاری کمیشن بورڈ کا اجلاس ہوا جس دوران ایچ بی ایف سی ایل کی نجکاری نئے سرے سے شروع کرنے کا فیصلہ کر لیا گیا جبکہ ہاؤس بلڈنگ فنانس کمپنی کی نجکاری کا موجودہ عمل ختم کر دیا گیا۔
نجکاری کمیشن کے مطابق روزویلٹ ہوٹل نیویارک کی نجکاری کیلئے نیا عمل شروع ہو گا، روزویلٹ ہوٹل کیلئے فنانشل ایڈوائزر کی دوبارہ تقرری کا فیصلہ کیا گیاہے، اسلام آباد انٹرنیشنل ایئرپورٹ نجکاری پروگرام میں شامل کر لیا گیا ۔
اعلامیہ کے مطابق اسلام آباد ایئرپورٹ کی کنسیشن ماڈل کے تحت نجکاری کی سفارش کی گئی جبکہ ایشیائی ترقیاتی بینک سے فنانشل ایڈوائزر پر مذاکرات کی منظوری بھی دیدی گئی ۔ اجلاس میں حکومتی سطح پر براہ راست جی ٹوجی معاہدہ کا آپشن مسترد کر دیا گیا ۔
حیسکو اور سیپکو کی نجکاری کیلئے ٹرانزیکشن کمیٹی قائم کر دی گئی، اجلاس کو بریفنگ میں بتایا گیا کہ ڈسکوزکی نجکاری عملدرآمد کے مرحلے میں داخل ہوگئی، نجکاری کے تمام مراحل میں شفاف اور مسابقتی عمل کے عزم کا اعادہ کیا گیا ۔
ایچ بی ایف سی ایل کے 51 فیصد حصص کی فروخت منسوخ کر دی گئی، صرف ایک بولی موصول ہونے پر نجکاری عمل ختم کرنےکی سفارش کی گئی ، پی ایم آر سی ایل کی 4.2 ارب روپے کی بولی مسترد کر دی گئی، حکومت کی مقررہ قیمت 13.55 ارب روپے تھی۔
ایچ بی ایف سی ایل کی نجکاری نئے سرے سے شروع کرنے کا فیصلہ کیا گیاہے، نجکاری کیلئے نیا فنانشل ایڈوائزر مقرر کیا جائےگا۔
