باجوڑ میں سیکیورٹی آپریشن کے دوران شہید ہونے والے میجر عدیل زمان کی نمازِ جنازہ ادا کر دی گئی۔
آئی ایس پی آر کے مطابق نمازِ جنازہ پشاور گیریژن میں ادا کی گئی جس میں چیف آف دیفنس فورسز، آرمی چیف فیلڈ مارشل عاصم منیر نے بھی شرکت کی ۔ اس موقع پر وفاقی وزیر داخلہ، کور کمانڈر پشاور اور عوام کی بڑی تعداد بھی موجود تھی۔
فیلڈ مارشل عاصم منیر نے میجر عدیل زمان شہید کی عظیم قربانی کو خراجِ عقیدت پیش کیا اور کہا کہ پاک فوج کے شہداء قوم کا فخر ہیں اور ان کی قربانیاں ہمیشہ یاد رکھی جائیں گی۔
آئی ایس پی آر کے مطابق فیلڈمارشل نے شہید کے بلندی درجات اور لواحقین کیلئے صبرواستقامت کی دعا کی ۔
میجرعدیل زمان شہید کو پورے فوجی اعزاز کے ساتھ ڈیرہ اسماعیل خان میں سپردخاک کیاجائےگا۔
بعد ازاں فیلڈ مارشل سید عاصم منیر نے سی ایم ایچ پشاور کا دورہ کیا، جہاں انہوں نے آپریشن کے دوران زخمی ہونے والے افسران اور جوانوں کی عیادت کی۔ فیلڈ مارشل نے زخمی اہلکاروں کی جرأت، استقامت اور پیشہ ورانہ عزم کو سراہا اور ان کی جلد صحتیابی کے لیے نیک تمناؤں کا اظہار کیا۔
آئی ایس پی آر کے مطابق پاکستان مسلح افواج ملک سے دہشت گردی کے مکمل خاتمے کے لیے پُرعزم ہیں اور شہداء و غازیوں کی قربانیاں اس عزم کو مزید مضبوط بناتی رہیں گی۔
